Associacion pel Desvolopament de l'Escrich Occitan (A.D.E.O.)
B.P. 28 - 81370 Sant Sulpici la Punta
Tel : 05.63.40.09.33 - fax : 05.63.40.02.90
Corrièl : desvolopament.oc@wanadoo.fr
C.C.P. 4 854 13 P Tolosa
Catalògue de difusion 2004
Colleccion « Escriches politiques »
N° I : « Nuclear ? Parlem-ne ! » de Sèrgi Viaule.
La sola pretencion d’aquesta procadura es de rebrembar als Occitans que lo
dangièr nuclear grelha de pertot. L’informacion es de las mai escarsas sus
aqueste sicut considerat coma « secret defensa » per l’Estat jacobin.
Alavetz, seriá estat damatge de faire pas un pauc de publicitat als qualques
libres e estudís que son estats publicats sus l’industria nucleara, civila e
militara.
En occitan. 50 paginas. Prètz : 6,10 €
N° 2 : « Occitània fàcia al cambiament » de Gustau Aliròl, Felipe Carbona,
Robèrt Lafont e Gerard Tautil.
Una brocadura per ensajar de respondre a la question tras que simpla de
saber se lo pòble occitan pòt trobar la capacitat de prene son avenidor en
mans, es a dire d’assumir la sieuna identitat e la far democraticament
respectar. Es qu’anam èstre los etèrnes et cetera de las presas de paraulas
e autras publicacions en rapòrt amb las lengas e identitats regionalas ? Es
que la societat occitana sauprà lèu-lèu s’afortir dins l’egalitat amb las
autras de biais a assegurar son avenidor especific al dindre de la Republica
e dins l’encastre de l’Union Europèa ?
Bilingüe occitan/francés. 56 paginas Prètz : 6,10 €
N° 3 : « Curdistan ; una nacion camica de cap a son independéncia » de Sèrgi
Viaule.
Per tan luènh que remontèssem dins lo temps, los Curdes an sempre
resistit a l’assimilacion. Agèron de longa de contener las invasions pèrsa,
araba, russa o turca. L’istòria recenta s’es encara facha sus l’esquina
d’aquel pòble que vòldriá un jorn poder viure liure sus sas tèrras. D’uei
despartida subre quatre Estats que son Iran, Irac, Turquia e Siria, la
nacion curda a de mal a coordonar sos esfòrces per se ganhar la libertat.
Mas dins una situacion geopolitica defavorabla d’a fèit, resista e ten cap
als pièges dels imperialismes amb una fièrtat e un coratge remirables.
En occitan. 50 paginas. Prètz : 6,10 €
N° 4 : « Un siècle d’occitanisme politique » de Sèrgi Viaule.
Se tracha pas d’un obratge d’istòria. Luènh d’aquí ! Aquò’s aquò lo
trabalh d’un militant. La precision s’ameritava d’èsser portada que, amai se
la brocadura relata d’un cèrte biais l’istòria d’un sègle d’occitanisme
politic, o fa a travèrs lo filtre personal de l’autor. D’unes traparan que
lo tèxte es pas plan objectiu dins la presentacion dels diferents moviments
e partits politiques que i son mencionats. Que cadun sapie que i a pas
d’istòria objectiva e que totes los istorians, sens cap d’excepcion, «
s’arrengan » amb los faches, quand van pas fins a los « arrengar » a lor
profuèch coma n’es lo cas pels istorians jacobins franceses.
En francés. 60 paginas. Prètz : 6,10 €
Colleccion « Territòris e societat »
N° 1 : « La condicion paysanne » de Thierry Bartoli.
Miri sovent aquestes olius sens edat, descarnats per las geladas e lo
fuòc, quilhats demest aquestas muretas burinadas e aquestas vinhas que butan
dins lo qüars e aplondan lors rasigas dins la vasta espandida d’iòda.
Qual sap s’aquestas generacions de gasanha, artesana d’aquesta
civilitat, seran solublas dins l’idèia de « patrimòni », o dins la de
paisatge ?
Qual sap se seriá pas aquí l’expression d’una modernitat sens projecte,
sonque pensamentasa de salvar son passat ?
Es de saber se i auriá pas per la nòstra agricultura occitana d’autre
asuèlh qu’aqueste « aplant sus imatge » ?
En francés. 52 paginas. Prètz : 6,10 €
N° 2 : « Paisan de la vila, vilandrés del campèstre » de Thierry Bartoli.
Lo problèma del foncièr apareis coma lo nosèl ont se crosan la capacitat de
nòstres espacis a modelar un territòri e la de la collectivitat a mestrejar
las condiscions de son viure amassa.
La fractura dicha urbana es d’uèi territoriala e l’inflacion del foncièr e
del lòtjament dessenha la mapa de las inegalitats novèlas. L’espandiment
desordonat de la vila a un còst ecologic (espetada dels carreges), material
e social, emai torna metre en question lo modèla urban europèu.
Qual sap se la mixitat sociala, retornarèla coneguda de las politicas de
coësion, bastària per descriure los enjòcs ?
Bilingue occitan-francés. 48 paginas Prètz : 6,10 €
Colleccion « Escriches literaris »
(Totas las publicacions son en lenga nòstra)
Quasèrn N° 1: « Naturalament » de Sèrgi Viaule.
Aquò’s aquò Alain Kervern, militant nacionalista breton e professor de
japonés, que faguèt descobrir l’aicó al Sèrgi Viaule. Aqueste mejan
d’expression poetica li agradèt còpsec. Malgrat son cadre estricte
d’engimbradura (tres vèrses de 5-7-5 sillabas), l’aicó permés de daissar
traça d’un sentit emocional, per tan figidís que siague.
56 paginas. Prètz : 6,10 €
Quasèrn N° 2: « Qualques nòvas d’Albigés » de Sèrgi Viaule.
En escriguent aquestes tèxtes, l’autor se defend d’aver volgut far autra
causa qu’òbra d’escritura. Espèra, ça que la, que la resulta de son trabalh
permetrà als legeires d’i trapar lor compte.
Aquelas sèt novèlas son plan disparièras, amai se las aparéncias porián
plaidejar lo contrari. D’unas son estadas escrichas fa pas gaire, mentretant
que d’autras o foguèron fa vint e cinc ans, o mai.
56 paginas. Prètz : 6,10 €
Quasèrn N° 3: « A costat del vent » de Cristian Rapin.
« A costat del vent » es un recuèlh que conten de tèxtes plan
desparièrs. Lo qu’a donat lo titol a l’obratge es inedit. De segur qu’es una
novèla erotica, mas es tanben un tèxte plen d’optimisme e d’amor de la vida,
sens parlar d’una bèla dòsi d’umorisme e d’autoderision que daissam al
lector lo suènh de ne far la descobèrta.
Traparetz dins aqueste quasèrn nòu contes o novèlas que pòrtan
testimoniatge d’una recèrca exigenta en escritura.
60 paginas. Prètz : 6,10 €
Quasèrn N° 4 : « Garona » de Cristian Rapin.
Cauds e cargats de paraulas marmusairas coma o son los codols de Garona, los
poèmas de Cristian RAPIN son aquí per nos rebrembar l’umanitat vièlha de la
joventa Occitània. L’emocion carrejada de lengalinda pels mots del poèta nos
invasís per bèla e requista pausa. Es un vertadièr bonur de se daissar anar
al ritme e al grat d’unas sentidas tan fugidissas que ponhantas. L’autor
agenés nos encanta per l’entrevescament destricat e ardit de sas esteticas
lengarèlas, bastidas a tòcas finas e mirgalhadas. Jamai lo flume-termièra
entre Lengadòc e Gasconha foguèt pas cantat amb tanta sensualitat e
delicadesa. L’èime poetic de Cristian RAPIN nos manda dins un univèrs
embelinaire e sens confinhas.
52 paginas. Prètz : 6,10 €
Quasèrn N° 5 : « De la man de l’endeman » de Pau de Ligonièr.
Anatz èsser espantat per aquela recèrca originala dins lo debanar e la
cadéncia dels sons. Lo ritme dels tèxtes i es de longa sincopat. Cada poèma
naviga preciosament entre cant e contracant. Jòcs de mots, jòcs de sons,
mots en fèsta se venon còp e còp enfonilhar sens cridar para dins una musica
generosament subrerealista. Las associacions d’idèias fan a sauta cavalet
suls images mentals qu’arrestan pas de s’entrevescar. Aquesta poësia es una
dança fòla, descabestrada, dedicada a la libertat de paraula.
Conjuntament a l’ingimbradura de las sonoritas, la presentacion dels
tèxtes, sens ponctuacion brica, fan de gaire, de cada pèça, una òbra
plastica. I a plan temps que nos èra pas arribat quicòm de tan nòu en
poësia.
56 paginas Prètz : 6,10 €
Quasèrn N° 6 : « Papieròts romegaires » d’Alan Roch.
La responsabilitat del cronicaire, arrestada pel Conselh Superior de la
redaccion de la Setmana del Menebés e confirmada per un referendum dabans un
aperitiu asagat al muscat de Sant-Joan, la responsabilitat del cronicaire es
d’anar veire pus luènh que la realitat de las causas e de furgar dins las
prigondors de l’èime e de las paraulas.
52 paginas Prètz : 6,10 €
Quasèrn N° 7 : « Orguèlh rasonable » de Sèrgi Viaule.
Pòt èsser que la poësia siá temptar crear lo mai de musicalitat que se
pòsque amb lo mens de nòtas possible. Pòt èsser que la poësia
consistiguesse, a mendre mots, congrear lo mai d’emocion possible. Pòt èsser
far dançar la vièlha dins lo sicap del legeire amb de sentits partajats dins
l’apartenéncia a una meteissa civilisacion. La poësia pòt èsser trobar las
sonoritats que s’endevenon per aviar l’imprevisibla portada emocionala de
l’èsser. Pòt èsser la poësia…
60 paginas Prètz : 6,10 €
Quasèrn N° 8 : « Tabat » de Pau de Ligonièr.
Aquí lo segond recuèlh de poësias de Pau de Ligonièr. I traparetz la
meteissa desinvoltura dins la forma e la pensada, la meteissa decontraccion
chifrada dins lo contenent e lo contengut. Un camin que s’embarassa pas
d’orièras, e se tira, landrejant, amb un umor, quora leugièr, quora mai
grèu.
Pau de Ligonièr vos endralha sus la via de la fantasiá e de l’imaginacion.
Vos refusa pas res, nimai lo trebolum o lo pet de folia, nimai la libertat !
E vos acompanha amb la musica, qu’es l’alcòl de la mescladissa.
Condicions de venda als libraris:
Las comandas se pòdon passar per corrièr postal, per facs o per corrièr
electronic.
Remesa de 30 % suls prèses publics mencionats sus aqueste catalògue.
Liurason de la mèrça franc de pòrt e d’embalatge. La factura es junta al
mandadís.
Pagament per chèc a l’òrdre de « ADEO ».
Condicions de venda als particulièrs
Las comandas se pòdon passar per corrièr postal, per facs o per corrièr
electronic.
Pagament a la comanda per chèc a l’òrdre de « ADEO ».
Los prèses son los mencionats sus aqueste catalògue.
Liurason de la mèrça franc de pòrt e d’embalatge.