ENDAVANT ! Un projècte de renovacion de l’occitanisme politic

Plata forma_hor

ENDAVANT : qu’es aquò ?

Endavant!  es le projècte d’une organizacion politica qu’aura coma ambicion de respondre a las preocupacions de nòstra societat, que son socialas, economicas, ecologicas e culturalas. La question de las decisions, que sián politicas o economicas, de la manièra e dels endrets ont se prenon, es una question màger.

Endavant! sera doncas una organizacion politica federativa e democratica, dubèrta a totes los que desiran obrar pel desvolopament d’una consciéncia ciutadana occitana coma element d’una ciutadanetat planetària.

 

Quals sèm per bastir aquèl projècte ?

Sèm d’occitans, de personas que vivon en Occitània, conscientas de lor especificitat. D’unes parlan la lenga e la transmeton. D’autres la parlan pas mas considèran qu’es un element important que cal desvolopar e qu’es de la responsabilitat de totes los que vivon sul territòri occitan, quala que siá lor origina.

Volèm metre aqueles elements de l’identitat occitana al servici del desvolopament de nòstre territòri

L’uniformizacion culturala es un factor d’apauriment. Es lo resultat d’una concepcion inegalitària de las culturas, dels pòbles e doncas dels individús. Es a l’origina de frustracions e fa nàisser de fenomèns comunitaristas perilhoses.

L’Euròpa la vesèm federala. Fòrça decisions ditas de « Brussèlas » son per la màger part de decisions dels caps d’Estats amassats dins lo Conselh europèu. Es pas aquò que pòt far una Euròpa democratica. Per nosautres refortir l’Euròpa es un mejan de refortir la democracia.

La politica europèa actuala es donc marcada per una vision economica que pren pas en compte lo necessari cambiament virat cap als objectius màgers que son la reduccion de las inegalitats, una melhora reparticion de las riquesas e un desvolopament equilibrat bastit sus la sobrietat de consum dels espacis e de las riquesas naturalas.

Volèm doncas federar de federalistas, democratas, ecologistas, europeïstas que vivon en Occitania.

 

De qué volèm parlar ?

La centralizacion en França entrava lo desvolopament durable dins los domenis economic, social, cultural e lingu?istic. Lo centralisme limita l’exercici de la democracia dins nòstres territòris.

L’Union europèa es un espaci pertinent per tal que s’organize un federalisme de las regions d’Euròpa. Lo federalisme es per nosautres lo biais de prendre compte las constrenchas ecologicas planetàrias ambe lors consequéncias economicas e socialas. Sèm favorables a çò que s’apèla « lo federalisme diferenciat ». Se tracta de préner en compte la diversitat de las situacions e la diversitat dels territòris.

Lo poder de las collectivitats territorialas es un enjòc màger per las annadas que venon. Las solucions als problèmas d’energia, de rescalfament climatic, de ressorsa en aiga, de proteccion de la biodiversitat, e de qualitat de l’environament se pòdon pas trobar dins una manièra de far centralista. Sèm favorables a una capacitat de decision politica de las regions qu’ane fins a la competéncia legislativa, çò qu’es pro corrent en Euròpa.

Lo sistèma fiscal francés priva las collectivitats de quasi totas ressorsas pròprias. Es un factor de dependéncia de las collectivitats ; las paraliza e las desresponsabiliza. La qualitat de la democracia ne patís.

 Lo famós eslogan «Viure e trabalhar al país» anonciava, de son temps, la necessitat de cercar de modèls economics que permetan un desvolopament equilibrat. La centralizacion politica acompanhada d’una centralizacion economica es un factor de fragilitat.

Pensam que l’economia se pòt pas regular sonque gràcias als mercats. Podèm pas esperar, ni desirar, que torne un creis economic a l’anciana. Aquel creis tornarà pas de tot biais. Ne cal inventar un autre. Lo desvolopament se deu bastir ara sul melhorament de las condicions de vida de totes e, primièr, dels pus desfavorits.

Consumir totjorn mai es pas la solucion, produsir mai tanpauc. Cal combinar la satisfaccion dels besonhs socials ambe la conversion de l’economia cap a una utilizacion sòbria de las ressorsas naturalas. Es la basa per un creis novèl. Los progrèsses de productivitat dins lo tribalh devon servir primièr a la reduccion de las inegalitats.

 Pausam la question de la lenga occitana e de la cultura que pòrta. Pensam qu’aparar una lenga e una cultura es un objectiu politic màger e que la diversitat es necessària al desvolopament uman. Lo fenomèn d’uniformizacion apaurís la capacitat dels òmes a inventar de solucions novèlas de desvolopament, adaptadas a cadun dels territòris e a caduna de las situacions. Cal per la lenga occitana una politica publica dinamica e un estatut legau clar e digne.

Globalizacion, cambiament climatic, diversitat culturala e lingüistica, democracia territoriala, mutacion energetica, fòrmas novèlas d’organizacion de la produccion e del consum : son las questions que preocupan l’umanitat en aqueste començar de sègle.

Sètz interressat-da per participar a aquèste projècte ? Per rejonher la reflexion colectiva, escribir a info@endavant.eu