1. Lo fach occitan : Lo Partit Occitan es dreibit a tots los òmes, a totas las femnas que reconeissen lo fach occitan tant dins sa realitat istorica e sociala coma dins sas manifestacions per se tornar reviscolar e bastir.
2. Per un engatjament politic : Lo Partit Occitan assembla tots ’quilhs e totas ’quelas que volen esser partida prenenta dins los debacts politics d’aura, que volen participar aus engatjaments sociaus e economics, dins totas las expressions de la vita en societat.
3. Dins la via democratica : Lo Partit Occitan conduis son accion per tots los biais democratics de la vita politica, especialament en participar a las consultacions electoralas.
4. Per l’autonomia : S’engatjar per una societat occitana mestressa d’ela-mesma ‘quò es respectar las reglas democraticas. Lo Partit Occitan a l’intencion de lutar per la reconeissença de la comunautat occitana e per la defensa daus interests de sos membres, per reabilitar la lenga d’Òc, tant en-dedins coma en defòra de l’estat francés ; particularament au nivèu de l’Euròpa. Tau es lo sense de sa volontat d’autonomia.
5. Per la justícia sociala : Un engatjament politic occitan es una dubertura a totas las obligacions d’una societat democratica, mai que mai a la justícia sociala e economica. Pòt pas esser separat de la luta en favor daus mai demunits.
6. Emb l’Euròpa de deman : Lo Partit Occitan pensa que un daus pretzfachs mai urgents, tant per la vita de tots los jorns coma per l’avenir de nautres tots, es la construccion de l’Euròpa; d’una Euròpa daus pòples e de las regions.
7. Per respectar los drechs de l’Òme (individú e collectivitat) : Lo Partit Occitan trabalha per lo respect daus drechs de l’Òme dins lor dimension individuala e collectiva. Esser solidari dau Tierç-Monde e agir per la patz son doas prioritats.
8. Per respectar la planeta : Lo Partit Occitan pensa que tota societat a la responsabilitat d’una part dau patrimòni naturau de la planeta. Que es responsabla, tant davant las societats que li son vesinas coma davant las generacions a venir. Pòt dispausar d’aqueu patrimòni mas a pas lo drech de ne n’abusar.
Una question mai ? Escrivetz-nos !