Catalonha los democratas europèus devon tirar leçons de las eleccions del 14 de febrièr

La question de l’independéncia es pas l’afar del Partit Occitan. Es l’afar dels catalans. Pasmens, lo Partit Occitan, per rasons evidentas es atentiu a tot çò que pertòca la democracia en Euròpa.

Lo P.OC constata que los electors catalans an votat en favor de partits indendentistas, de partits favorables a une solucion politica del conflicte entre l’Estat central espanhòl e Catalonha.

La primièra leçon que cal tirar d’aqueras elecions es que los que foguèron condamnats per lor accion en favor de l’independéncia devon èstre amnistiats e devon tornar trobar una libertat complèta.

La segonda leçon es que los partits independentistas governaràn en Catalonha e, pel primièr còp, o faràn amb una majoritat en siètis al Parlament e amb una majoritat en voses dins las urnas.

Lo govèrn de Madrid deu tirar las leçons d’aquera situacion. Un pauc mai de tres ans après la repression organizada lo jorn del referèndum de 2017, las ideas independentistas contunhan de progressar. Lo dialògue es obligatòri. I pòt pas escapar.

Euròpa tanben dèu tirar las leçons d’aquera situacion. Los diferents govèrns europèus que son demorats muts e sords a la crida faita pel democratas catalans al moment del procès dels reponsables politics independentistas, devon ara intervenir per que las valors democraticas sián respectadas en aquel territòri europèu qu’es Catalonha.