Tradution : http://locebier.free.fr
D’aquela pontannada escura, que serà estremada sota lo signe dei fondamentalistas musulmans,- aquela empega!- nos restarà un sentiment d’amarum. Lo chaplàs dei jornalistas de Charlie hebdo, l’assassinat dau monde de la supereta casher nos remanda ais annadas quaranta ambé la purificacion etnica, l’eliminacion dei desviants, l’instauracion de la terror fascista. Deguna civilizacion es immortala en fàcia de la barbaria, tala seriá la leiçon immediata de l’eveniment.
Pasmens, nos fau espepidonar un pauc mai lei rasons dau pelau que rescòntra aquela societat. De joines, desintegrats dau mòtle "republican", an seguit de percors identics -dei guètos hlmizats, dau caumatge ai pichòtei trafecs-, per se retrobar a Fleury-Mérogis e anar puei au djiad. Manipulats o consents, son ignorants de sa propria cultura, victimas d’una astrada que mestrajan pas ges.
De monde de la drecha e de la senèstra governamentala – e parli pas de l’unanimisme dei caps d’Estats au doble discors venguts manifestar dins la capitala dau centre dau Monde-, se son mobilizats dins un movement d’union nacionala jamai vist dempuei de temps. Totei, Son Charlie ! A l’Assemblada, a la votz, la Marseillaise es estada cantada per que « lo sang impur raje dins lei regas ». La Republica una e indevesibla s’ es assolada dins una manifestacion d’exorcisme patologic e repepiat. Es lo nòstre Joanon, J.Jaurès, que remembra dins un escrich lo mòt dau convencionau Barnave que dobtava de la puretat dau sang versat après lo massacre d’aristocrates : « Prepaus òrre, car tre que lei partits començan de dire que lo sang es impur que raja dins lei venas deis adversaris, se meton a l’escampar abòrd e lei revolucions vènon tuarias. »
L’autra leiçon deis eveniments dau 6 de genier es esconduda, fa gaire, dei prepaus tenguts per lei partisans d’una ideologia racista e xenofòba dei pichotei frasas assassinas. Lo paire Le Pen es vengut orfèbre dins l’ignominia. Es estat seguit per lei lipacuòus sarkosistas, Hortefeu e Gaino. Sens oblidar lei « odors e sentors » de Chirac dins son discors de Brest. Aquesta classa politica es lèsta de trobar de bòchis expiatòris per de gasanhs electoraus. La situacion d’ara es favorabla per aprefondar aqueste climat de tension. Islamofòbia e antisemitisme a la manòbra. Rason de mai de se laissar pas prendre a la leca dei cons e dei salòps.
Gerard TAUTIL
Tradution : http://locebier.free.fr