Enfrontat als nombroses "afars" qui trebolan son imatge dins lo sentit public e en cò de sos partesans, lo govern, a travers de son ministre de l’Imigracion e de l’Identitat nacionala, ensaja una diversion : lo "grand debacte sus l’identitat nacionala : qu’es aquò d’èsser Francés ?"
Per de qué se demandar pas en primièr a qualas identitats los ciutadans franceses se restacan e subretot cossí se definisson, segon la question d’Aimé Césaire "Francés a part entièra o Francés entièrament a part ?"
L’estat-nacion França dobte d’el meteis.
Pas sens rason, per que d’uèi, la question es : "A de que servís l’Estat francés ?". L’Euròpa en bastison l’obliga a des transferiments de competéncias de mai en mai vesedoires. D’un autre band, l’eficacitat demandariá una devolucion dels poders de decision cap a las regions. En rèire-plan, l’Estat montre sa flaquesa de respondre a las crisis ecologistas e economicas e a las demandas socialas, daissant de caire maitas missions de servici public qu’asseguravan un minimum social. Lo dèute s’enauça d’un biais catastrofic, a l’opausat de las promessas electoralas de 2007. L’imigracion, primièra competéncia del ministre Eric Besson, es lo carga-l’ase somiat. Aquò per tornar far venir a la popa de l’UMP, los electors d’extrema-dreita dins una amira utila per las regionalas de 2010.
Pasmens, las identitats d’uèi son multiplas e lo motle de l’estat-nacion es tròp redusaire per correspondre a una realitat sola. Las identitats se restacan a l’encòp als territòris ont vivèm (país-region-estat-Euròpa-Planèta Tèrra) mas tanben al seu camin pròpia (parents-conjunts-amics). Aquesta pluralitat permès de trespassar l’istòria francesa faita de confrontacions violentas en Euròpa o suls autres continents (conquistas, guèrras mondialas, colonisacion).
Lo debacte, atal prepausat pel ministre Besson es bescairat.
Lo Partit Occitan afirma la realitat d’una identitat occitana basada sus una lenga e una cultura milenàrias e portaira de valors preciosas per l’avenidor : toleréncia, respecte de l’autre, ciutadanitat, egalitat dins la diferéncia …
Aquelas valors s’exprimisson d’uèi dins lo projecte social e ecologista aparat pel Partit Occitan per las eleccions regionalas venentas, dins lo ramosament Euròpa Ecologia.