n° 170 : L’AFAR DE CARCASSONA
Espectacle occitan : zèro sus 110 !
Suspresa a Carcassona, a la fin de març, amb l’anóncia de la programacion del Festenal de Ciutat de 2010. Suls 110 espectacles previstes, pas un d’occitan !
E dire que la municipalitat d’esquèrra, elegida en setembre passat, compta un adjunt encargat « del monde occitan » (que se reclama de País Nòstre) ! E son los meteisses que se quichavan per èsser sus la fotografia lo 24 d’octòbre a téner la bandeiròla Elegits per l’occitan : lo deputat-conse, l’adjunt a la cultura-president de la Comunautat d’Aglomeracion-conselhièr general encargat de la cultura, la primièra adjunta-vice-presidenta regionala, l’adjunt a « l’occitan » ! Amai lo candidat-conse aviá escrit qu’ara endavant l’occitan seriá present dins totas las programacions de la vila !
Dempuèi 4 ans, la municipalitat de dreita aviá daissat un desenat de jorns al grop Òc ! per presentar sos espectacles istorics (1907, Riquet, la Crosada) en agost amb una capitada pro bèla (mai de 26 000 espec-tators en 2009).
La non-presa en compte d’espectacles occitans pel Festenal de 2010 menèt a d’explicas foscas e injustificadas :
mesa en causa publica de la qualitat del grop Òc (felicitat del temps de la campanha electorala !) mesa en causa dels grops occitans qu’aurián pas fait de proposicion (alara que n’i aviá e que lo trabalh d’un programator es de cercar, furgar, s’informar...) endeutament de la vila (alara que s’agís de faire causidas dins una envolòpa).
L’occitan compta per res !
Al-delà de las protèstas bèlas que montèron a la Comuna mai larjament que del mitan occitanista, aquel episòdi demòstra un còp de mai la tròp espandida manca de reflexion e de volontat dels elegits rapòrt a l’occitan.
Un còp o l’autre, son capables de respondre a una demanda puntuala mas arriban pas a integrar l’occitan dins una demarcha globala. Es quand mème pietadós qu’una vila coma Carcassona amb ton son ric passat medieval, age pas cap de luòc permanent o de manifestacion regulara consacrada a aqueles moments fòrts de l’istòria del país d’Òc ; es pietadós d’aver una vila qu’a a l’encòp las filièras Calandreta e public (e a comptar de la dintrada duscas al Licèu) integrèsse pas l’occitan dins totas las animacions...
Per eles, l’orizont indespassable es aquel del provincialisme apiejat sus una manca de coneissença e de fisança dins las capacitats mobilizatriças de l’occitan. « Avec cette programmation, nous apportons la culture aux Carcassonnais », coma se n’avián pas, los paures d’eles ! Ramon de Miraval, August Forès o Renat Nèlli son d’escrivans de pacotilha, lo reviscòl de la cançon occitana en tèrra d’Aude a la fin de las annadas 60 de parpèlas d’agaça... Vist que la cultura « oficiala » los reconeis pas. E Cristian Salès (Òc) es atal qu’un musicalhonet de vilatge alara que los chineses l’an convidat a metre al punt un espectacle son-imatge per l’Exposicion universala (pel pavalhon internacional, e non pel « local » de França !). Sèm aquí pas que per engolir modèls pastorizats o los reprodusir e non pas per obrar mercé als escambis e al dialògue entre lengas e culturas.
Als milions de toristas, vòlon ofrir çò qu’aquel monde a ja a l’ostal e res d’original. « Respondre a la demanda » es vengut un leit-motiv en plaça de se balhar mejans de proposar dralhas novèlas.
Amb de practicas dins d’autres domènis e dins lo rapòrt a las associacions (tipe : apèl a projècte de Total festum que met las associacions en concurréncia), l’idèia que predomina es que l’esquèrra es tombada dins una cultura de mercat amb una confusion entre cultura e programacions. La causida es faita de la consomacion (dels modèls parisencs o internacionals) e non pas una cultura-accion.
Se i aviá que Carcassona !
Es Carcassona que se trapa aquí dins l’uèlh del ciclòne, mas quant de vilas, de departaments fan pas quna misèria per l’occitan !
E qunas batèstas de menar per de chicas e de micas, coma per poder ausir quatre mots d’occitan dins lo metrò de Tolosa
E d’aquel temps lo govèrnament ditz que tot va plan per las lengas de França.
E la coordinacion Anem Òc ! e sos recampaments bèls de... Carcassona (dos còps) s’es aconsomida o qué ?
Leon Castèl
(18/04/2010)
