Lo rencontre amb la raportaira de la proposicion de lei sus las lengas regionalas al Senat, en vista del debat que se deu debanar lo 30 de junh, nos a permés de donar nòstre punt de vista sus una eventuala lei.
Sabèm plan que del debat al Senat sortirà pas un tèxte de lei. Es clar que los senators auràn pas lo temps en quatre oras (al mai) d’estudiar seriosament un tèxte e de lo votar.
Serà donc un escambi de punts de vista e benlèu los premicis d’un futur debat mai larg e mai eficaç.
Guilhèm Latrubesse e David Grosclaude an explicat a la raportaira, la senatora Colette Mélot, que per eles una lei èra necessària quitament se d’unes dison lo contrari. La legislacion actuala empacha fòrça iniciativas de se desvolopar e empacha de respondre a las atentas de la populacion que mòstra son interès e son sosten a tot çò que pòt permetre de desvolopar la lenga nòstra.
La lei que deu imperativament venir, pòt pas èstre un catalògue de çò existent mas deu èstre un vertadièr cambiament dins l’actitud de la Republica fàcia a sas lengas. Es donc clarament que los dos elegits diguèron que lo tèxte prepausat èra tròp flac e que l’original, abans d’èstre retalhat, èra fòrça mai interressant.
Es la question de la transmission que dèu èstre al centre de la redaccion d’una lei. Vòl dire que los tres domenis que son l’ensenhament, los mèdias e la vida publica son prioritaris. L’objectiu es de far remontar lo nombre de locutors.
La situacion particulara de l’occitan, çò diguèron los elegits del P.OC, obliga a una politica interregionala. A començat e es une collaboracion que cal apregondir.
Las regions son de collectivitats pertinentas per la politica en favor de la lenga, a condicion d’aver los mejans politics e financièrs de menar aquela politica. Aquò o diguèron tanben en prenent l’exemple de la preséncia de las lengas dins los mèdias. L’idèa qu’una partida de la redevença televisuala siá consacrada al desvolopament de programas e de mèdias en occitan es una idèa que lo P.OC sosten.
Sus l’ensenhament, la sensibilizacion l’ensenhament bilingüe e l’ensenhament per immersion, son totes tres indispensables.
Pertocant la constitucion, los elegits del P.Òc an plan explicat que seriá de mal comprendre qu’un article de la lei fondamentala foguèsse sonque « decoratiu ». Diguèron a la raportaira que lor semblava que los parlamentaris avián mai a far que de s’amassar per votar un tèxte que fa la lei fondamentala « mai polida ».
Los dos elegits del P.OC èran acompanhats per lor collèga elegit de Ròse-Alps (RPS/EE) Belkacem Lounes, encargat de l’occitan el tanben dins sa region. Èra donc una delegacion que voliá mostrar de faiçon concreta que la collaboracion entre regions occitanas es ja una realitat.