n°180 : Occitania 2012 : cambiament d’agulhatge
Occitania 2012 : Una formula novela per vòstra revista.
Aprep una annada de soscadissa, lo comitat de redaccion d’ « Occitania – Volem viure al pais » a decidit de vos prepausar un jornal un pauc diferent.
De qué va cambiar ? Mai de fotos e mai de diversitat ! Anam fa appel a de plumas de grand renom : David Grosclaude per exemple. Puèi volem dubrir la revista a de subjectes novels e ligats a la cultura occitana. Vos prepausarem per exemple dins cada n° un article sus un vinhairon e sos vins, escrich per un especialista de l’enologia : Giròni Perez.
Per marcar aquela novela etapa de la revista cambiarem tanben la coberta. En mai lo rotage serà professionalisat per respectar la reglamentacion e esperam, ganhar en eficacitat. Enfin una version « pdf » de la revista serà disponible sus internet.
Mas l’esperit demòra : prepausar un jornal diferent, analisar la societat e prepausar de solucions que preservan e desvolopan la cultura, l’economia, la societat, la natura, en un mot la civilisacion occitana.
Quora va cambiar ? Tre lo numero seguent, lo 181.
Avem besonh de vòstra ajuda per capitar aquela mudason. Lo còst de l’abonament va creisser de 1 euros per passar a 24 euros los 6 numeros anuals. Mas aquo bastarà pas per assegurar un equilibri financièr mai que fragile. Avem pas, e volem pas cap de subvencion ! Los abonaments son de luenh la principala sorga de revenguts. Se fasem una formula novela es tanben per far parlar de la revista e atirar de legeires novels. Anam lançar una campanha de comunicacion, far de publicitat, d’intervistas eca… Mas lo boca a aurelha es un mejan extraordinari per se far coneisser. Es per aquò que fasem appel a vosautres, mai que jamai, dins aquel temps de crisi nos fa besonh vòstra ajuda.
Vos prepausam doas possibilitats :
Ambassador d’Occitania :
Recebretz en mai de vòstre jornal, 2 exemplaris suplementaris per vendre o ofrir a l’entorn de vos. Prepausatz al monde de s’abonar, e nos transmetetz los chècs d’abonament. Al cap de dos abonats novels vos ofrissem un libre a causir dins lo catalòg de l’ADEO.
Per venir Ambassador d’Occitania : esser abonat mai una participacion de 17 euros.
Abonament descoberta :
Es la possibiltat de pairinar una persona de vòstra coneissença en li pagant un mini abonament per sieis meses al pretz de 13 euros. Al cap d’aquel periode la persona poirà causir de perlongar o pas !
Comptam sus vosaus per far avançar nòstre jornal, nòstras ideas, nòstra vision del monde !
Podetz completar lo bulletin responsa aquí dejos e lo tornar a :
ADEO, 15 carriera del Gamay, 81 600 GALHAC.
- bilheta_oc_2012_pel_180.pdf