La lenga per bastir deman : Totes a Tolosa lo 31 de març !
22 mars 2012
“Lo Partit Occitan apèla a participar a la manifestacion de Tolosa.
Considèra que l’unitat a l’entorn dels drets a la reconeissença per la lenga occitana es indispensabla.
Dempuèi d’annadas, lo Partit Occitan demanda la mesa en plaça d’un estatut per la lenga.
Un còp de mai se cal amassar per far ausir aquela demanda qu’es ara clarament una demanda sociala.
Ont a d’elegits, lo Partit Occitan met en plaça d’accions concretas e de politicas que pòdon favorizar la transmission de la lenga e son desvolopament.
Plaideja per la mesa en plaça d’una collaboracion estreta entre las regions occitanas sus la question linguistica e per la creacion d’un organisme interregional a l’escala de tot lo territòri de la lenga d’òc.
Pel Partit Occitan, aquò necessita una organizacion federala a l’escala de l’Euròpa e un vertadièr poder per las regions.
Pel Partit Occitan, la lenga es un element indispensable per bastir lo desvolopament futur del territòri occitan e per donar a las femnas e als òmes que i vivon una clau màger per imaginar un desvolopament economic e sociau originau e respectuós dels grands equilibris ecologics vitals.
Dins la crisi economica que travèrsa lo monde, las questions de diversitat linguistica e culturala son pas segondàrias. An de consequéncias suls rapòrts entre los pòbles e sus la qualitat del dialògue que permetrà de trobar de solucions als grands problèmas que son pausats a l’ora d’ara a l’ensemble de l’umanitat.”