En marge de la votason dels Députats, lo debat ciutadan s’afoga a l’entorn de la signatura del Tractat sus l’Estabilitat, la Coordinacion e la Governança d’Euròpa (TSCG), mai conegut jol nom de "Tactat Budgetari".
Lo TSCG a per amira de plantar de règlas comunas a la gestion budgetari dels Estats membres de l’Union Europenca (UE). Las discutidas a l’entorn de sa ratificacion arriban dins un climat de crisi economica e budgetària jamai viscut aperabans : maites Estats, per causa de dèutes sobeirans abissals, mai de 120 del cent del PIB per Grèça, son a ras de far quincanèla. D’autres, atal França e Alemanha, respectèron pas los critèris del Tractat de Maastrich fondats fa 20 ans a.
Lo Partit Occitan constata que los opausants al TSCG, del Front Nacional [i] al Moviment Republican e Ciutadan [ii] en passant pel Front d’Esquèrra [iii] crentan la meteissa causa e per consequéncia lo refus de la "pèrda de sobeiranetat nacionala".
Per que tot l’enjòc del tractat es plan aquí : èsser solidaris per sortir pel naut de la crisi budgetària. Se cal balhar los mejans de parar a l’implosion de l’UE e refusar de daissar de caire los que la crisi budgetari escana, en particulier los mai febles.
Lo Partit Occitan ten de rementar que son plan los Estats Nacions en plaça, en tota sobeiranetat, que farguèron, en partida, la crisi que los pòples devon pagar. Son lors pròpias causidas asardosas, per respondre al dògme del productivisme e de la creissénça a tota fòrça que meton ara lors ciutadans en dangièr.
Lo TSCG a pas per tòca de metre los Estats jol jo de la finança, coma d’unes ça-dison, mas al contrari de sortir d’aquel estat de crisi. Son plan d’ "investiments" a pèrda, provocats pels Estats pendent de decenias, que ara mènon a la pauperisacion dels ciutadans europencs, amb fòrças politicas de requilhament impausadas per las bancas ! Per que s’agís plan de las bancas qu’an 40 del cent del dèute dels Estats de la zòna eurò e que dictan lors condicions.
Dins una Europa ont los Estats son interdependents [iv] e ont lo sentit de solidaritat entre los Pòples demòra lo cement l’Union, lo TSCG es una òsca de mai dins lo trespassament del egoïsme dels Estats Nacions cap a una Euròpa Federala e Solidària que lo Partit Occitan sona de sos vòts.
Los centenats de miliards d’euròs investits dempuèi la debuta de la crisi d’un biais multilateral pels Estats de l’UE e lo FMI, sens fixar de règlas comunas dins la gestion de las finanças an servit pas qu’a embucar un potz sens fons que los sols beneficiaires son las bancas. De fach, aquelas impausan liurament als Estats en crisi unes tausses de remborçament mai que vergonhoses.
Euròpa se dèu dotar d’un dreit d’agach sus las gestions publicas e s’assegurar del bon respècte de la règla establida en comun. Lo dèute causat pels Estats ipotèca l’avenidor de las generacions a venir. L’escapada en davant se dèu doncas acabar.
Lo Partit Occitan sona a votar en favor del TSCG per parar a l’agreuvament de la situacion que, o vesem, fa pujar los extremismes, los egoïsmes e lo replèc sus se. Lo politic dèu tornar prendre la man fàcia als mercats e tornar orientar sos investiments cap a una societat duradissa.
La votason pel TSCG se dèu acompanhar d’una refòrma institucionala d’Euròpa. Aurà per amira de renforçar la democracia e la ciutadanetat. Aquel afortiment politic d’Euròpa e los trespassament dels Estats Nacions se podrà faire pas que sus una basa democratica e federala. Cal balhar al Parlament Europenc, elegit pels ciutadans, lo poder de decision a posita de tota amassada elegida dins una democracia federala. Lo Parlament dèu dispausar de totes los poders de contraròtle sus un govern europenc eissut de sa majoritat e non pas nomenat pels Estats. Vaquí las condicions de la capitada de l’ "Idea Europenca".
Guilhèm LATRUBESSE
Contacte premsa :
Guilhèm LATRUBESSE
06 24 70 78 57
secretari.federal@partitoccitan.org/archivas