En favor de la patz a Baiona
11 novembre 2012Qu’èram 15 000 a Baiona entà demandar que los govèrns espanhòu e francés hacin quauquarren entà amuishar que vòlen la patz.
E aquò que passa per un gèste de cap aus presonèrs.
Que soi tostemps estat opausat a la violencia, qu’ac èi dit e escriut. E que contunhi de diser com ac canta Luís Llach que « se la luta ei sagnosa serà tostemps dab la vergonha de la sang » Mes se non i a pas avançadas deus dus costats non i aurà pas de patz e pas de democracia.
Alavetz que dèishin de bohar sus las brasas los qui extradeishen Aurore Martin e que caminen cap a ua solucion de patz com estó lo cas en Irlanda.
Aquera situacion au còr de l’Euròpa non pòt pas durar. Que cau saber arrestar ua guèrra.
Qu’ei a’s demandar se non i a pas monde qui an interès que contunhe lo conflicte.
Que saludi los mens collègas de colors politicas plan divèrsas qui èran tanben presents a la manifestacion e que saludi lo president de la Region Aquitània qui a escriut aus dus govèrns francés e espanhòu entà demandar de har sortir Aurore Martin de la soa preson.
Qu’èram 15 000 a Baiona e que pòdi diser shens aver paur de m’enganar que mantuns centenats de personas èran viengudas pr’amor de las declaracions d’un cèrt ministre pendent la setmana abans la manifestacion.
Ni lo País Basco, ni un aute conflicte non deu servir a reglar questions politicas intèrnas a un partit o a essajar de se’n servir entà enterra ua descentralizacion dejà pro timida.
David Grosclaude
Conselhièr regionau d’Aquitània
Partit Occitan
Membre deu Grop EELV
