Article de La Setmana - Bastir ! : de candidats son decidits
22 novembre 2013Bastir ! : de candidats son decidits
- Divendres, 22 Novembre 2013 10:55
Un centenat de personas an pres lor decision : s’anaràn presentar jos l’etiqueta Bastir !
Sèm a quatre meses de las municipalas e pauc a pauc las causas se precisan pel movement Bastir !. Avèm ja parlat, dins las nòstras edicions precedentas, de cent a cent cinquanta candidats potencials. Cal parlar ara d’un centenat de candidats qu’an fait conéisser lor decision definitiva de se presentar amb l’etiqueta del collectiu occitanista. Cinquanta autres serián encara dins l’expectativa.
Segon las nòstras informacions, l’acampada del comitat de pilotatge que s’es debanada a Tolosa lo 9 de novembre a permés de ciblar encara mai de comunas ont i a de candidats que se poirián lançar o encara d’elegits que se dison interessats pel projècte Bastir !. Lo comitat de pilotatge trabalha sus una carta d’engatjaments que lo candidat deurà tenir se jamai se fa acceptar dins una lista. Trabalha tanben a un contracte d’engatjament pels caps de lista. Se pòdon engatjar amb de colistièrs d’esquèrra o de dreta parlamentària... Pas question per eles d’èstre presents sus una lista d’extrèma-dreta.
Candidats ja plaçats
Es una causa de se voler presentar mas se cal
encara far acceptar dins una lista. De discussions son ja plan
avançadas dins d’unas municipalitats de talha ampla. Se
parla ja de Tolosa, Montauban,
Nimes o encara Aush... D’autres se posicionan
dins de comunas de las aglomeracions del Grand Tolosa o encara de Pau.
Lo comitat de pilotatge principal (que recampa de sòcis dels comitats
locals de Bastir !) espèra tanben
d’aver de candidats del costat de Narbona, Besièrs e tanben
Montpelhièr. Son ja 27 candidats occitanistas «
plan plaçats » per se far elegir e venir delegats
a la lenga e a la cultura occitanas dins lor comuna de residéncia.
Mencion especiala pel departament de Tarn ont de candidats occitanistas
seràn presents dins totas las grandas vilas.
Una lista sagelada Bastir ! serà tanben creada a Aurenja (Vau Clusa) e menada per la conselhièra municipala d’oposicion Ana Maria Autant. Aurà especialament per adversari lo conse sortent Jacques Bompard, conse d’extrèma-dreta, fondator de la Ligue du sud. S’es illustrat en ensajant de far expulsar manu militari la dòna Autant pendent un conselh municipal. Aviá pas gaire presat que l’elegida l’interpelèsse sul finançament d’un projècte immobiliari.
Dins las accions venentas, i a subretot l’encontre de totes los candidats qu’es previst pel primièr de febrièr a Tolosa. Tornamai, los participants a l’acampada del 9 de novembre se son estonats de « la timiditat que tòca, còps que i a, de monde del movement dit cultural ». A cada còp, la solucion avançada es de far de pedagogia sus la « necessitat d’èstre presents deman dins las municipalitats, que sián petitas o grandas » pasmens afortisson que « de monde novèl arriban e Bastir ! permet de far dintrar dins l’occitanisme actiu de monde qu’èran duscas ara en defòra ».
Inf. : www.bastir2014.com
Citer cet article : http://partitoccitan.org/archivas/article956.html
© Partit Occitan 2009 |
Contact |
Mentions légales |
Plan du site