Patric Roux, elegit del Partit Occitan al Conselh Regional de la region Miègjorn-Pirenèus Lengadòc-Rosselhon ( en esperant ua denominacion mai acceptabla) es estat elegit president del Centre Interregional de Documentacion occitana de Besièrs e pren la seguida de l’elegit catalan Marcèl Matèu qu’occupèt aquel pòste duscas ara.

Sabèm que lo trabalh qu’es estat aviat dempuèi qualques annadas pel CIRDOC seguirà. L’equipa professionala de l’establiment a ja provat sa capacitat a bastir una vertadièra bibliotèca nacionala occitana, amb una gran capacitat a far partatjar l’istòria, la memòria la lenga e la cultura de nòstre país.

Patric Roux a afirmat que sa volontat èra d’ajudar lo CIRDOC a seguir sus aquela via qu’es la de l’afirmacion de la preséncia de la creativitat de la cultura occitana, particularament gràcias a las tecnologias novèlas.

Lo CIRDOC es una aisina maja per la difusion de nòstra cultura, de nòstra istòria, de nòstra memòria. Sabèm que Patric Roux farà lo trabalh necessari per que s’afirme encara mai coma lo lòc ont cadun, dins lo monde, poirà venir querre la pèira que pòrta la cultura occitana a la construccion d’un monde ont unitat e diversitat se pòdon pas desseparar.

David Grosclaude

david.grosclaude(a)partitoccitan.org

Lire cet article en français : https://partitoccitan.org/en-direct/comunicats/lo-cirdoc-a-un-novel-president