Desempuish quauques mes e enqüèra mei desempuish quauques setmanas, imatges òrres qu’an sensibilisat la populacion europèa. Detzenats de milierats de personas que s’arronçan a las nostas termièras entà huéger la guèrra, la dictatura e la misèria. Votz que’s hèn enténer entà’ns brembar lo noste dever de saber arcuélher. Lo Partit Occitan mescla la soa votz a totas aqueras votz.

Qu’avem lo dever d’arcuélher solide, mes tanben lo dever d’espiar lo monde tau com ei. Non podem pas denegar la realitat o essajar, com ac hèn quauques uns, de cercar faussas solucions qui’ns permeterén d’escapar au noste dever d’arcuélher.

Temptar d’opausar las populacions europèas qui son tocadas per la crisi a aqueths milierats de refugiats qui arriban a las nostas termièras qu’ei criminau.

E i avaosse un imatge tarrible per l’aviéner que seré plan l’imatge d’ua Euròpa qui’s seré embarrada sus se-medisha, dens l’incapacitat d’espiar lo monde tau com ei, tau com l’avem hèit tanben. Qu’avem la nosta part de responsabilitat en la situacion de uei. Que devem assumir la nosta part, shens culpabilitat, mes dab dignitat en arcuélher los qui n’an pas mei arren. 

David Grosclaude

Secretari federal

Conselhèr regional d’Aquitània

Partit Occitan