Decentralisacion : Hollande dèu anar mai luènh dins la regionalisacion
12 octobre 2012Lo President s’es exprimit suls contorns del "Acte III de la decentralisacion" a venir, a la fin dels Estats Generals de la democracia locala.
Gustau Aliròl, president del Partit Occitan, èra present : "D’unes jogan l’immobilisme en volent servar totes los escalons administratius, un modèl insenat per rapòrt als nòstres vesins europencs. Devem anar cap a de regions fòrtas se volem pas qu’aquesta refòrme s’ajaça d’una mirga."
Lo Partit Occitan saluda la volontat del President de la Republica d’afortir l’anament de la regionalisacion. La refòrma a venir balharà mai de poders a las regions : clarificacion de las competéncias, competéncias nòvas, talhas pròpias … e mai l’autreg – s’es possible – d’un poder reglamentari. Lo dreit a l’esperiment de las collectivitats serà alarguit e mai plegadís. Conformament a las pausicions que lo Partit Occitan defend, la région es plan la collectivitat "centrala" de l’estapa nòva de decentralisacion.
Çaquelà, lo Partit Occitan sona los partidaris d’una vertadièra decentralisacion a gardar l’uèlh dubèrt : lo discors de François Hollande, atal coma los estats generals de la democracia territoriala, daissan de caire la question centrala e essenciala de l’Euròpa, absenta dels debates. L’escalon despartamental es pas remès en question, alara que nombroses rapòrts sonan a los tornar considerar al profièch d’instàncias regionalas mai operacionalas e de comunas e "paísses" dotats de competéncias alarguidas. En mai, lo risc d’un desequilibre urban-rural, ligats a la creacion de las metropòlis, foguèron pas evocats.La "regionalisacion diferenciada" que permès la creacion d’estatuts adaptats a las realitats localas foguèt pas abordada. En fin, al despièch de las proposicions de la comission "Lengas regionalas" de l’ARF e las promessas de campanha, la question de la politica lingüistica foguèt encara un còp pas mencionada. Lo Partit Occitan demanda en particulier la competéncia lingüistica de plen exercici per las lengas regionalas.
Lo Partit Occitan saluda doncas l’iniciativa de F. Hollande, del Senat e del govern. Çaquelà, esperam de l’Acte III de la decentralisacion una refonda en prigondor de l’organisacion territoriala francesa e refusam que s’ajaça d’una simpla "clarificacion legislativa" de las competéncias de las collectivitats.
Se França vol afortir la democracia locala e melhorar lo ligam entre sos elegits, es grandament ora que dintra dins la modernitat, en s’inspirant dels modèls europencs ont aquesta democracia foncciona, en balhant a las regions competéncias nòvas e apleches innovants.
Guilhèm Latrubesse,
Pòrta-Paraula,
Partit Occitan
Contact premsa :
Guilhèm LATRUBESSE.
06 24 70 78 57
- F. Hollande a A. Rousset 24/08/2012
- ARF : les langues dans l’Acte III de décentralisation