(Fòto David Mc Kelvey– CC)
Malgrat la decision del tribunal administratiu de Marselha de regetar lo recors contra la Declaracion d’Utilitat Publica (DUP), los opausants al projècte de linha novèla Provença Alps Còsta d’Azur (LNPCA) s’organizan e se fan ausir aqueste estiu.
Del costat de l’oèst de Var, lo collectiu « Stop LGV Sud Sainte Baume » organiza son apèl a la decision del tribunal e trabalha sas proposicions alternativas mens costosas tant en argent coma en CO2, ensajant d’evitar l’augmentacion de la pression fonsièra sul terrador de l’appelacion Bandol. A l’èst lo monde economic e los elegits prenon posicion e sostenon la creacion d’un collectiu novèl StopLNPCA dins l’Esterèu.
Amb aquel projècte, assistissèm a una guèrra de posicion entre lo president de la Region Renaud Muselier (èx-LR vengut Renaissance en 2022), tanben president de la societat Ligne Nouvelle, e lo conse LR de Sant Rafèu Frédéric Masquelier. Aqueste denóncia especialament la dobla casqueta del president de Region, l’acusant de chantatge a las subvencions per l’adesion de las collectivitats al projècte. Declara dins son comunicat del 30 de julhet : « après aver fait del virament de vèsta una disciplina politica de se-meteis, d’ara enlà lo vaquí mèstre dins l’art de la dobla casqueta que li permet de defendre una societat que presidís dins la Region que dirigís ».
Uèi los arguments contra lo projècte e especialament contra las fasas 3 e 4 son totjorn tant d’actualitat, que siá lo còst faraminós de mai de 14 miliards d’euros per un vintenat de minutas ganhats sus un París-Niça amb la partida europèa del budgèt totjorn en question, lo còst environamental de la bastison pels tunèls, ponts, passatges dins las vinhas e lo desengatjament constant dins los transpòrts de proximitat per l’ensemble del territòri provençal.
La LNPCA èra ja a sa creacion un caprici dels elegits que vòlon lor gara, es uèi un otís politic per un president de la Region… tot aquò sus l’esquina dels estatjant.a.s que deuràn pagar de lor pòcha aquela guèrra dels ego per las trenta annadas venentas se l’Estat acaba pas lèu aquel gorg financièr.
Lo Partit occitan rapèla son oposicion als grands projèctes LGV que se desvolopan sul territòri occitan, que siá en Provença o en Gasconha. Aqueles projèctes son tròp costoses, correspondon pas a la nòstra vision de l’agençament del territòri, de l’ecologia e grèvan los budgèts de las collectivitats. La prioritat deu èsser donada a la renovacion e la modernizacion de las linhas existentas.