Patric Roux : « Nòstra region es a la crosiera dels camins ! »

Dimenge passat, la lista Monde novèl en commun, menada per Gerard Ònesta, obtenguèt una resulta de 10,26 %. Lo Partit Socialista, el, capitèt pas de far mai de 24,41 %.

Dimenge que ven, lo FN podria dirigir nòstra region.

Aquela perspectiva es insuportabla ! Seria un insult a nòstra istòria, nòstra identitat, nòstra cultura de Convivéncia e de Paratge.

Cal n’en pas dobtar : lo FN es lo primier enemic de l’occitanisme. La natura prigonda de l’Extrema-Dreita es la de l’Estat fòrt, ultra-bonapartiste, e son vejaire per çò qu’es de las lengas regionalas n’es ren d’autra qu’una fantasmagoria paternalista e passeista. Al moment del vòte al Senat sus la Carta Euròpenca de las lengas regionalas, sol lo FN votèt contra a l’unanimitat, çò que demostra clarament una ostilitat  fòrta e resolguda.

Imaginem un momenton çò qu’adviendria de la politica regionala per las Calandretas, pel Cirdòc, per l’oPLo coma per l’ensems de las associacions occitanas…

Son nòstres enemics los mai radicals !

Occitanistas convençuts, sabem far la diferéncia entre adversaris e enemics.

Dimenge de ser, tanlèu la resulta coneguda de nòstra lista, una decision responsable fuguèt presa : far jonccion amb la lista menada per la Caròle Delga per assegurar una baradissa clara, neta, franca al FN.

Encotrerèm la Caròle Delga amb sa còla de campanha dins la nueit del dimenge al diluns. Lo Guilhèm Latrubesse, amb io, fasiam partida de la delegacion de negociacion. Los escambis fuguèron constructius e sens cap d’empacha. La jonccion s’es faita d’un biais respectuós de la proporcionalitat estricta.

Ara, amb Guilhèm Latrubesse, sem dos occitanistas sus la novèla lista, menada per la Caròle Delga.

Uèi, soi solet en posicion eligibla (6ema dins Auda). Guilhèm Latrubesse, el, es en posicion 32 en Garona-Nauta. Aquò es degut a la resulta insufisenta del vòte del 6 de decembre per nòstra lista Monde novèl en commun.

Uèi, sabem doncas que n’i aurà punt d’autres elegits dins occitània tota.

La desapareguda de l’occitanisme dins l’ensems de las amassadas regionalas, òm pòt l’imaginar, seria una catastròfa per nautres.

Per l’occitanisme, lo FN al poder seria una apocalipsi.

Dins una majoritat socialista, o sabem, n’es pas nòstre programa qu’es aplicat. Mas podem trabalhar. Lo bilanç del Guilhèm, del David e del Gustau son aqui per lo demostrar.

Enlà del sol occitanisme, la victòria del FN seria una menaça grèva per las femnas, los joves, l’egalitat e la libertat. Seria la victòria de las discriminacions. Atacas contra la cultura, contra nòstres dreits…

Quò’s pr’amor que cridam a totis los occitanistas de votar, dimenge 13 de decembre, clarament per la lista « Nòstre sud en commun » menada per Caròle Delga e Gerard Ònesta.

L’occitanisme poirà comptar amb ièu per portar e defendre nòstras posicions e nòstres interèses dins la futura amassada regionala.

Pas una votz deu mancar !

Mercés a caduna e a cadun.

Patric Roux

 

Las darrièras publicacions / Les dernières publications :

rolloverimagesample