Accueil > En savoir + > Débats > Convencion occitana

Convencion occitana

23 juin 2001

CONVENCION OCCITANA
36, car. Gatien Arnoult
31000 TOLOSA

Lo Comitat d’Inicativa per la Convencion Occitana comunica :

Acampats a Montpelhièr lo 23 de junh de 2001, de militants de sectors divèrses de l’accion occitana an constatat que pas jamai dempuèi de sègles, la causa que defendon aviá rescontrat d’endevenença tan favorabla !

1. Un debat s’es dobèrt, amb l’afar còrs, sus la deriva istorica qu’a tresmudat la pacha federala francesa de 1789-90 en un Estat que son centralisme autoritari es passat de constitucion en constitucion fins a uèi. Emergís lo desir d’autonomias regionalas e d’una democracia territoriala vertadièra. Desenant es permés d’enfaciar una reforma federala d’aquel estat que se crispa dins son arcaïsme.
2. Aquesta evolucion se completa pel debat qu’a començat sus las institucions europèas. L’ipocrisia enòrma dels estats que, dins la construccion europèa, an abandonat lo famós “mercat nacional” e mai la devisa nacionala, en tot se reservar lors poders suls òmes, esclata a bèls uèlhs vesents. Un “sobeiranisme”, cauquilha tan constrenhenta coma vuèja, se crispa. A tèrme es condemnat pels abandons qu’el-meteis a consentits (80 % de las decisions que fan la vida dels franceses son pas pus francesas, mas europèas). Una Euròpa federala, que garentís de dreches umans modernizats, succedís en amira d’istòria al chauvinisme dels Estats.
3. Dins lo movement de la construccion europèa, e tanben jols còps de la globalizacion economica a la quala los Estats, França compresa, an decidit d’obesir, de mai en mai vesèm aparéisser d’articulacions dels espacis regionals que son naturalas, transfrontieralas e desterritorializantas. Aital ven evident que sus aqueste espaci occitan, ont las relacions Nòrd-Sud e Oèst-Èst se crosan, se jogaràn la mutacion culturala e de doberturas novèlas pendent lo tresen millenari.
4. La revision istorica a començat. Se pòt pas pus ignorar los crimes multiseculars de l’estatalisme guerrejaire ni los mai recents del colonialisme. La sacralitat de l’istòria de França se fendascla. Desenant es permés de percebre l’istòria de l’espaci e de la societat occitanas, que fins ara òm estremava dins lo silenci o la reduccion provinciala. La granda aventura d’un país, qu’inventava al sègle XIII una Euròpa dobèrta, ressortís del croton, prèsta qu’es per se tornar justificar de modernitat.
5. Una morala lingüistica universala s’establís e se condensa al nivèl europèu. Lo Conselh Constitucional francés refusa la Carta europèa de las lengas regionalas e minoritàrias, mas lo contengut d’aquesta repareis dins las proposicions del ministre de l’educacion nacionala. Pels occitans, lo temps del “patés”, lo temps de l’autoòdi qu’una campanha descervelaira ofiala lor a impausat, es revolut. Lor es dobèrt lo temps per reprene la creacion culturala ont Euròpa aguèt autres còps una de sas fonts majoralas. La lenga d’òc, dins sa diversitat rica, es lèsta uèi per jogar tornar-mai lo sieu ròtle dins l’aveniment del respècte de se e dels autres en Euròpa.

La remonta d’Occitània a l’istòria es, per nosautres, un fach d’evidéncia. Es tanben una evidéncia qu’Occitània pòsca jogar tornar-mai sas oportunitats dins una democracia territoriala novèla, qu’emergís gràcias al passatge ineluctable de l’Estat autarquic auroritari cap a una Euròpa democratica. Aqueste fenomèn bèl concernís 15 milions de ciutadans e una superficia del tèrç de França. Aquò nos estona pas que los esperits formats a l’Estat-barralha e a la tancadura parisenca ajan de mal de se o concebre. Admeton Corsega, lo País Basc, Bretanha, Alsàcia. Passan l’espaci occitan jos silenci. Rebufan son istòria, anciana e recenta, en tot finir per acceptar l’adjectiu.

Ara, als occitans lor tòca de dire se se vòlon laissar portar per aquesta èrsa de modernitat a son escala vertadièra, segon lor astrada de dobertura pacifica al Mond.

Lo Convencion Occitana, dins son percors dinamic, pren a prètzfach d’elaborar de proposicions dins aquel sens. Lo Comitat d’Iniciativa per una Convencion Occitana crida las personas e collectivitats que se reconeisson dins aquesta analisi de lor senhalar lor acòrdi a l’adreiça :

Convencion Occitana, 36 car. Gatien Arnoult, 31000 Tolosa.

Jónher un chèc de 15,24 € (a l’òrdre de "Forum civique et politique") per contribuir al foncionament.

© Partit Occitan 2009 | Contact | Mentions légales | Plan du site