MP : L’Amassada un clòsc voide o un palfèr politic per l’occitan ?
10 janvier 2010La region Miègjorn-Pirenèus, los despartaments, los servicis de l’estat (DRAC, DRAAF, Rectorat, Universitat) e las associacions se recampèron aquel 8 de genier de 2010 per butar mai en davant l’Amassada, lo conselh de desvolopament de la lenga occitana. Aurà calgut esperar la fin de las doas mandaturas socialistas per veire venir las sesilhas d’aganta tornar : la signatura d’una convencion ambe lo Rectorat per l’occitan se faguèt pas qu’en fin d’annada 2009.
L’amira electoralista escapa pas al Partit Occitan. La pression de las eleccions regionalas es, aquò rai, positiva per la lenga occitana, demora pas que de s’engatjar dins lo temps per :
Una vertadièra volontat politica : la preséncia de l’occitan dins la vida vidanta depend de decisions politicas assumidas. L’arrivada de l’occitan dins lo metrò tolosenc s’es faita mercès a l’elegit Verd Stephane Coppey. Fòra del Partit Occitan e dels Verds, pas un partit politic a mostrat lo nas cap a aquela operacion que costèt pas un sòu a la collectivitat.
Una dimension interregionala : lo desvolopament de l’occitan s’arresta pas a las termièras de Miègjorn-Pirenèus. Las regions vesinas (Aquitània, Lemosin, Auvèrnha, Lengadòc-Rosselhon) son de partenaris, atal tanben al sud lo Val d’Aran.
L’emergéncia d’un ofici public de la lenga occitana : las politicas lenguïsticas que fonccionan sul territòri basco o breton ne’n balhan l’exemple.
Un budjecte a l’auçada dels enjòcs : en Miègjorn-Pirenèus, lo budjecte per la lenga occitana per estatjant trespassa pas los 0,50 € alara que la Bretanha balha 3€, lo país basco 10 €. Consequéncia l’ensenhament immersiu o bilingüe tòca mens de 1% dels escolans alara que l’UNESCO considera qu’en dejos de 30 % de locutors, una lenga es en dangièr.
Lo Partit Occitan Miègjorn-Pirenèus nòta que l’Amassada es un primièr pas important, mas cal anar mai aviat çaquelà. Prepausa, al sen d’Euròpa Ecologia, una politica lingüistica ambiciosa sus l’airal sancèr de las regions occitanas. Servar la diversitat culturala dels nòstres territòris s’inscriut dins una ecò-bastison de las nòstras regions.
Guilhem Latrubesse, porte parole du Partit Occitan Mieidia-Pirenèus
Contact-presse : Guilhem Latrubesse
Tél. : 06 19 15 31 64