Sebastian wrote :
“Adiu en totei,
Mi dién Sebastian, siáu Marsilhés e ai 23 ans de tèms...
Vos vòli felicitar pèr vòste sìti e subre-tot pèr l’encauva nòstra qu’aparatz totei embé fiertat e amor...
Coma va podetz vèire, escrìvi en grafia normalizada mai tanbèn sàbi escriure en mi grafia d’origina, la mistralenca...
Normalament escrìvi en mistralenc mai, pèr una melhora comprenènça entre nautrei escrìvi en normalizada...”
Auriatz pogut escriure en mistralenca, la comprene quitament si la pòde pas escriure.
“Mai, ai dos vò tres questiens...
Perqué Tolosa porriè èstre la capitala de l’Occitanià ?
Perqué pas Marsilha vò-z-Ais-de-Provença ?”
I a pas de pausicion oficiala deu P. Oc sus la question. Si prenem la vila mai bela, segur Marselha es possible. Mas per lo moment la question nos sembla segondaria... Dins lo project nòstre, l’Occitània seria regionalisada : una federacion de regions. De mai la "capitala" podria esser una vila petita emb una fonccion administrativa... Volem pas tornar segre lo modele exagonau emb sa region capitala que minja tot quò autre !
“E tanbèn, ai vist que diatz que l’inne officiau de l’Occitanià es : Se Canta... E de la "Copa Santa" deque’n fètz ?”
Aquí nimai avem pas de doctrina. Lo "Se c(h)anta" es conegut de queu bòrd de Ròse mas la "Copa santa" representa maitot l’Occitània. Volem pas l’obludar.
“La partida maja dei Provençaus si volon pas identificar dins l’identitat occitana perqué si penson que lei gènts de l’autra Occitanià nos volon suprimir la grafia nòstra e lei simboles nòstres coma l’inne nòstre la Copa Santa pèr eisemple...
Aqui, si conoisse pas fòrca l’inne occitan "Se Canta", es pas tròp coneiguda...”
Coneisse lo problema mas dins l’Occitània que volem, volem pas tornar crear un centralisme noveu. Volem gardar las identitats provençala, gascona, lemosina, eca... Au P. Oc acceptem las doas grafias : dins nòstres sòcis provençaus, i a deus mistralencs, d’autres qu’escriven en la grafia normalizada. Tenem compte de las realitats coma son.
“E quora escotam lei gènts que parlon d’Occitanià, si sentem fòra-jitats perqué l’a rèn de rèn sus la cultura provençala, l’Occitanià es pluri-culturala, nàni ?”
Lo Partit Occitan a una seccion provençala, sem per l’Occitània "dis Aups aus Pirenèus" (sens obludar lo nòrd auvernhat e lemosin)
“Soncament volem gardar lei simboles nòstres e mi pènsi bèn que tot aquò es bèn normau... Alevat eiço siáu completament d’acòrdi sus ço que diatz e m’agrada fòrça ço que voletz far pèr lo païs nòstre...
L’Occitania tot’entiera deu èstre mai unida...”
Plan segur.
Vos conselhe de prener lenga emb nòstra seccion provençala, qu’avem mestier de jòunes per bastir lo país :
Region Provença - Partit Occitan
BP 2 - 84400 Gargas
regionprovence@wanadoo.fr
“Dins l’espèra d’una respònsa vòstra...”
Grandmercé per vòstre melh,
De còr e d’òc,
P. Oc.