Quate ans après son adopcion per referéndum, lo tribunau constitucionau espanhòu qu’a anullat aqueste dimars 29 de junh, 14 deus 200 articles de l’estatut d’autonomia de la Catalonha. Lo mot de nacion catalana qu’estó jutjat incompatible dab « l’unitat indissoluble de la nacion espanhòla ». D’autes punts qu’estón criticats com lo caractèr « preferenciau » de la lenga catalana dens los mèdias e l’administracion, e tanben l’autonomia judiciari e fiscau.
La sentencii deu tribunau constitucionau pausa la question deu rotle democratic d’aqueth tribunau e de la representativitat deus jutges. L’estatut d’autonomia qu’estó votat par los parlaments catalans e espanhòus, puish aprovat per referéndum deus ciutadans de la comunautat en 2006. La decision deus jutges que va contre la volentat de las populacions e deus besonhs d’emancipacion de las regions dens l’encastre europèu, e ne dèisha a Catalonha que la causida de l’independéncia entà existir.
En reaccion, la Partit Occitan qu’apèra a manifestar lo 10 de juilhèt 2010 a 6h deu vrespe à Barcelona[1] dab tot lo pople catalan. L’estat espanhòu qu’a d’espiar davant e bastir una organizacion federada, respectuosa de la soa diversitat, meilèu que de’s travar sus principis d’indivisibilitat e de’s hicar en dehòra de las evolucions institucionaus necessaris tà la democracia en Euròpa.
Guilhem Latruvèrsa, pòrte paraula deu Partit Occitan