A Lhèida per l’oficialitat de l’occitan
8 octobre 2010Guilhèm Latrubesse (conselhièr regional del Partit Occitan en Miègjorn Pirenèus) e David Grosclaude (conselhièr regional del Partit Occitan en Aquitània) participèron dimècres passat (06/10/2010) a Lhèida en Catalonha a l’acamp organizat a l’universitat qu’aviá per tèma la lei sus l’oficialitat de l’occitan en Catalonha.
Èran presents a aquela amassada de deputats del diferents grops qu’an votat en favor del tèxte. I èran tanben J.L Carod-Rovira vice-president del govèrn catalan e Paco Boya Sindic d’Aran.
Los diferents participants an dit que lo vòte d’aquela lei aviá un caractèr istoric. Notèron que podiá èstre exemplar per las autras regions occitanas.
Los dos elegits occitans an poscut puèi dialogar amb Paco Boya e J.L Carod-Rovira. Per eles, coma pel Partit Occitan aquesta lei dubrís una epòca novèla. Ara que i a un exemple d’oficialitat de l’occitan sus un territòri d’autres pòdon seguir.
Lo Parlament de Catalonha a volgut marcar que quitament parlada per una petita partida de sa populacion una lenga aviá dret a la reconeissença, al respècte e a la proteccion de las institucions.
Qu’espèra França per ratificar la Carta europèa de las Lengas ? Qu’espèra lo govèrn francés per far debatre al Parlament francés d’una lei que donarà reconeissença, respècte e proteccion a la lenga occitana ?
Sembla que lo govèrn tendrà pas la promessa que faguèt sus aquela question. Aquò nos fa dire que la solucion es entre las mans dels Occitans que se baton per lor lenga e que devon contunhar de far la pression necessària alprèp dels elegits e de las institucions per qu’avance enfin la legislacion francesa sus las lengas.
- Lo Partit Occitan a Lhèida, 06/10/2010
- Paco Boya, David Grosclaude, J.L Carod-Rovira, Guilhèm Latrubesse, Lhèida, 06/10/2010
