Au parat de las protèstas unitàrias contre lo projècte injust e apedaçat de las retiradas, dit Sarkozy-Woerth, lo Partit Occitan que renovela lo son sostien a l’ensemble de las organizacions sindicaus e a la societat civila qui afichan la lor determinacion despuish mantuns mes.
Qu’apèra donc a protestar los 12 e 16 d’octobre aus costats de las organizacions democraticas entà exigir deu governament que lo projècte de lei e sia retirat e que los Estats Generaus de las retiradas e sian convocats en totas regions, dab ua vertadèra negociacion dab los sindicats.
Lo problèma màger per las retiradas n’es pas tan l’alongament ipotetic de la durada « mejana » de vida, mes qu’es de determinar las rasons e las responsabilitats cap au manca actuau de moneda en las caishas e de quin biaish las poderem plear. Qu’es donc l’escadença de tornar considerar aquesta question au nivèu de las solidaritats (omis-hemnas, enter mestièrs, etc.) ; qu’es tanben lo moment de tornar trobar ua autentica qualitat de vida, l’accès au tribalh e lo son partatge, en tot preservar la dignitat de cadun ; qu’ei enfin lo ligader entre economia e territòris...
Atau, aquesta reforma, tan sensibla peus ciutadans, que deu estar lo resultat d’ua vertadèra consulta deu país, e non un diktat elisian.