Benlèu seriá melhor de pas dire res d’aquel adobament ministerial tant sembla sens significacion comparat amb çò que foguèt anonciat. Res a pas bolegat e res cambiariá pas se fasèm referéncia a las femnas e als òmes que compausan l’equipa governamentala. Lo capitani, François Fillon, a negociat lo dret de portar vertadièrament son braçard de primièr ministre. Caliá plan essajar d’amagar l’impopularitat grandassa del seleccionaire, Nicolas Sarkozy.
Al centre i a pas mai digun o quasi. L’UMP, encara e totjorn mai d’UMP. Los que demòran coma los qu’arriban, son talhats per acabar l’òbra de recentralizacion entamenada dempuèi de meses. Lo ministre de l’Interior es lo meteis ! Ara serà costejat per un minsitre de la collectivitats territorialas qu’es lo sol president de region de dreta elegit en març passat. L’alsacian Philippe Richert es tanben un senator qu’a votat la reforma territoriala que son objectiu es d’estofar la magra descentralizacion operada dempuèi qualques annadas. Lo ministre de la Cultura e de la Comunicacion demòra. Marrida novèla per nòstras lengas. Frederic Mitterrand es l’òme que canta pertot que tot va plan e qu’es pas necessària una lei que donarà un estatut a las lengas territorialas de França.
Lo president de la Republica, amb sas bracejadas, a ocupat tot l’espaci mediatic pendent tres jorns. A lançat sa campanha. La presidenciala serà donc d’ara enlà e per un an e mièg, la sola preocupacion dels comentators e des responsables politics. Aquò nos mena a nos interrogar sus la democracia e son foncionament en França. Sol compta un pòste e una eleccion, e çò d’autre comptariá per pas res ! L’oposicion seriá plan inspirada de prendre lo contrapè e de prepausar un vertadièr programa per las annadas venentas. Se tomba dins lo tracanard de la recèrca de la femna o de l’òme providencial, es condamnada a pèrdre.
Lo Partit Occitan es dins l’oposicion a Nicolas Sarkozy e dins l’oposicion a tot centralisme que siá de dreta o d’esquèrra. Sèm prèstes a participar a la definicion d’un programa per 2012 ont aquelas questions de descentralizacion seràn pausadas coma o seràn las questions socialas, economicas, ecologicas e lingüisticas. I trabalharem amb nòstres amics de la federacion Regions e Pòbles Solidaris e amb nòstre partenari provilegiat qu’es Euròpa Ecologia.
David Grosclaude, Partit Occitan Aquitània
Tel. : 06 45 59 46 66