Lo Partit Occitan vòl saludar la memòria de Jordi Barre. Lo cantaire catalan es mòrt la nueit passada e amb el es una personalitat immensa del monde de la cançon que se’n va.
Jordi Barre es un d’aqueles qu’a donat a la cançon catalana son prestigi. Dempuèi las annadas 60 Jordi Barre a pas quitat de celebrar sa lenga, son país e al delà lo dret d’una lenga qu’aviá pas de reconeissença quand comencèt de cantar, a viure e a dire lo monde.
Lo succès popular de Jordi Barre mòstra a quin punt a sabut tocar lo còr dels Catalans mas tanben de tots los que l’anèron escotar dins sas viradas europèas e mondialas.
Son estacament a la lenga catalana, l’a pas jamai abandonat. Nos demòran sas cançons per detzenas, sa votz e lo sovenir d’un òme qu’a consacrada sa vida a la musica e a la cançon.
Se caliá provar qu’un pòble es viu quand mòstra sa capacitat a cantar, Jordi Barre seriá un exemple.