Saludem la memòria d’Enric Garriga
29 novembre 2011Lo Partit Occitan vòl saludar la memòria d’Enric Garriga Trullols que nos a quitats la setmana passada.
Saludam primièr son esposa e tanben sos amics del CAOC .
Totes los occitanistas an presat son engatjament permanent en favor del refortiment dels ligams entre occitans e catalans. Avèm poscut mesurar la pregondor de son investiment personal cada còp que caliá mostrar que i a de ligams fòrts entre los dos païses, Catalonha e Occitània. Aaquestes ligams fan partida de l’avenir de nòstres territòris e son un element important per l’Euròpa de deman. Enric Garriga portava aquel messatge pertot en país occitan.
Era present a la fondacion deu Partit Occitan en 1987 e a d’autres eveniments organizats per lo partit.
Qu’un catalan coma Enric Garriga aja consacrat tantas annadas de sa vida a un trabalh en favor de la lenga e de la cultura occitanas nos aunora. Qu’aja, amb passion, cercat en permanéncia a far partejar sa passion per la tèrra d’òc nos dona a soscar sul trabalh que nos demòra de far.
Lo Partit Occitan saluda tanben l’engatjament en favor de l’independéncia de Catalonha e de la dignitat del pòble catalan.
