(Comunicat IEO-Aude : ieo11@ieo-oc.org)
"La manifestacion Anem Òc ! de Tolosa d’aqueste dissabte 31 de març foguèt una capitada : de vam, de determinacion… 30 000 personas, la chifra indica la demanda d’una societat de veire se trasmetre sa lenga e d’obténer los mejans d’aquela trasmission per la signatura de la Carta europèa, una lei e una vertadièra programacion linguistica.
Qu’una candidata e los representants de dos autres candidats per la presidenciala siaguen venguts dire a Tolosa lor sosten als objectius de la manifestacion e lor projècte es significatiu de l’enjòc ciutadan e democratic.
Segur que los manifestants e las associacions qu’organisèron lo recampament van contunhar d’interpellar los elegits. Es important de sotalinhar tanben la capitada de las manifestacions per las autras lengas de Kemper a Perpinyà e de Baiona a Aiacciu : França poirà pas mai demorar longtemps dins son embarrament fòra-sason rapòrt a las lengas e las culturas de son territòri. Mas se cal tanben metre pel cap que l’avançada de l’idèia occitana se bastís tanben cada jorn.
A totes los nivèls (associacions, comunas, departaments, regions, mitans economics, programatotrs d’espectacles, premsa, …), plan de causas se pòdon faire en daissant de costat unas practicas e unes discorses despassats e embarraires e en se plaçant dins una volontat dinamica per rendre mai present l’occitan dins la vida vidanta, a l’escòla e dins las mediàs."