Alara que las Jornadas Europencas del Patrimòni se dubrisson en 2012 jol tèma del "patrimòni amagat", lo Partit Occitan pausa la question : Qun patrimòni es mai "amagat" que lo patrimòni occitan ?
Picatz "occitan" sul siti http://www.journeesdupatrimoine.culture.fr, e descobrirètz un cèrt nombre d’eveniments ligats a la lenga e a la cultura occitanas. D’autres se veiràn en causissent "lemosin" o "auvernhat", "gascon" o "provençal", que lo patrimòni occitan es ric de sa diversitat.
D’aquel biais, nòstra cultura e nòstra lenga son acantonadas sonque dins lo domèni patrimonial, e aquò, un jorn per an. Seriá pas benlèu una caucion per las milhor amagar tot l’an ?
Per de qué las lengas regionalas aurián pas – atal dins los autres países d’Euròpa – d’apleches modernes per lor promocion e lor transmission : legislacion, valorisacion publica, accès als mediàs, ensenhament generalisat ?
Pel Partit Occitan, las regions devon èsser las menairas per de politicas en favor de las lengas regionalas : l’acte III de la decentralisacion dèu preveire un novèl partatge de las competéncias dins aquel domèni.
Guilhèm Latrubesse
Pòrta-paraula, Partit Occitan.
Contact premsa :
Guilhèm LATRUBESSE.
06 24 70 78 57