En dubertura de la Conferéncia Environamentala, lo 14 de setembre passat, Francés Hollande, s’apebant sus los "risques per la santat e l’environament", anoncièt "lo reget de set demandas d’esplèitacion de gas d’esquist" dins l’Exagòn.
Se lo Partit Occitan se feliciti de la declaracion del President de la Republica, pòt pas èsser presa coma una avançada màger : la rompedura idrolica es jà interdita dempuèi la lei del 14 de julhet de 2011. S’agís aquí pas que d’una confirmacion e non d’una revolucion en termes de causida energetica.
La question de la perseguida de la recèrca e de l’esplèitacion d’idrocarburs dins de condicions de mai en mai dificilas e doncas de mai en mai costosas demòra pausada.
Nombroses permeses cap a d’idrocarburs liquides o gasoses, en particulièr en Occitania, son encara en cors d’instruccion.
La vertadièra escomesa d’uèi es de capitar la transicion energetica. Recercar de tota fòrça novèlas ressorgas d’idrocarburs fariá pas que retardar la reconversion de nòstra societat alara que sabem plan uèi que lo risc màger per l’umanitat es de daissar coflar lo rescalfament climatic.
Amai se una tecnologia neta per tirar de gas d’esquist deviá èsser propausada, i seriam opausats.
Explicar d’uèi que de tirar de gas d’esquist seriá una sorga d’emplècs, aquò reven de dire qu’auriam lo dreit de comprometre l’avenidor de las generacions a venir al nom d’una ipotetica resolucion de la crisi actuala. Es una amira cortàssa, dangèirosa, una error econonomica e ecologica. Los investiments en matièra d’energia se devon virar primièr cap a las energias renovelablas. Es lo sol possible avenidor.
Atal, lo Partit Occitan sona a s’amassar lo 22 de setembre, en particular a St Cristòl d’Alès ont los colectius anti-gas d’esquist se van balhar rendetz-vos.
Contact premsa :
Guilhèm LATRUBESSE
06 24 70 78 57
secretari.federal@partitoccitan.org/archivas