Lo President de la Republica decidiguèt de balhar la prioritat a l’educacion e lo ministre Vincenç Peillon s’es balhat coma tòca de refondar l’escòla en dubriguent un debat larg sus totes los sicuts.
Se sauriá pas "refondar" l’escòla sens metre tornar en question lo ròtle que joguèt pel passat dins l’escanament de las lengas regionalas. Atal, en s’apebant sus las òbras dels psicòlingüistas e sociòlingüistas (Robèrt Lafont, per exemple) desiram pausar lo problema de l’insufiséncia de l’ensenhament de la lenga occitana.
D’uèi las òbras universitàrias e los esperiments sul terrenc mòstran que lo bilingüisme français/occitan es benefic pels enfants. A la vista de las evaluacions, los escolans que recebon e vivon la mitat de lors corses en occitan capitan en mejana milhor que los autres, i comprès dins la mestresa del francés. En mai, aqueles enfants desvolopan de disposicions e una mai fòrta curiositat per las lengas coma l’anglés, lo castillan, l’alemand, l’italian, eca …
Alara la question se pausa inevitablament : perqué d’unes e pas d’autres ? Perqué cada an qualquas classas bilingües dubrisson dins 3 o 4 despartaments e pas dins los autres ? Perqué la capitada escolària es pas proposada a totes ?
Pel Partit Occitan, aquela inegalitat pòt pas èsser acceptada. Totes los enfants d’Occitania, de Lemosin a Provença en passant per Gasconha, Lengadòc o Auvèrnha, se deurián vèser proposar un ensenhament bilingüe francés/occitan a paritat orària.
Daissam las familias causir de o segre o pas, amb lo manteniment per totes de la possibilitat d’un cursus en francés sonque. Seriá aquí una bravament granda avançada pedagogica que preparariá nòstra joinessa a afrontar la mondialisacion tot servant sas rasigas e un patrimòni vivent.
En mai, causir d’ensenhar las matematicas o l’istòria en occitan es tamben una causida economica mai que rendable : sens corses suplementàris, lo biligüisme s’installa e progressa. Per aqueles tempses de crisi es pas inutile de o precisar : recrutar de professors bilingües es pas mai car que de recrutar de monòlingües ! Aquò implica simplament d’anticipar en organisant en consequéncia concorses de recrutament especifics.
Las proposicions del Partit Occitan son a disposicion sus
http://partitoccitan.org/archivas/article818.html
Sonam cadun a participar en fasent tornar montar aquelas proposicions sul siti del ministèri :http://www.refondonslecole.gouv.fr/contact.
Hugues JOURDE,
Partit Occitan.
Contact premsa :
Hugues JOURDE
06 15 78 81 15