Amb lo 65% de las voses e pas luenh de 70% dels sètis al parlament de Vitoria/Gasteiz, los nacionalistas basques an ganhat las eleccions dins la Comunitat Autonòma Basca d’Euskadi. Lo Partit Nacionalista Basc se ganha la primièra plaça en voses e en sètis e lo partit independentista Bildu se tròba a la segonda. daissan atal plan luènh darrièr lo Partit Socialista e lo Partit Popular que, eles, sortisson de governar amassa pendent las quatre annadas que venon de passar.
Aquesta eleccion desmòstrariá, foguèsse necessari, que lo depaus de las armas decidit per ETA a clarament cambiat la situacion en País Basc.
Bildu, lo partit independentista a —coma anonciat per las enquèstas— reculhit las voses d’una populacion que s’èra pas poduda exprimir clarament dempuèi d’annadas pr’amor aqueste partit, o tota autra organizacion d’aquela mena, èra interdit acusat a priori d’èstre ligat a ETA. Aquela interdiccion trucava la màger part dels democratas europèus pr’amor èra abusiva e qu’anava a contrabriu del dret dins una democracia.
La violéncia d’una minoritat a doncas servit pendent maitas annadas d’argument per empachar una partida de la populacion basca que voliá la patz de s’exprimir, mas que voliá pas renonciar a sas conviccions sobeiranistas.
Lo PNB el, se tròba ara un còp de mai en responsabilitat, dins una situacion economica complicada, quitament si lo pais vasc a desvelopat una economia enrasigada localament merçès a la lor autonomia fiscala e dab utis adaptats (cluster, cooperativa). A tanben la carga de governar dins un País Basc apatzat, sens violéncia.
Sens aver jamai sostenguda la mendra justificacion de la violéncia, quala que foguèsse, lo Partit Occitan constata que lo pòble basc ven de mandar un messatge a l’Euròpa, al bèl còr de la crisi. Es un messatge que mandan tanben los catalans. Es lo d’una Euròpa federala,democratica, on los pòbles desiran d’èstre respectats dins lor identitat, lor lenga e lor cultura.
Es una epòca novèla que se dubrís pel aquel territòri europèu qu’es lo País Basc.
Lo Partit Occitan saluda aquela eleccion coma un depart novèl pel pòble basc e desira que siá lo començament d’un procèssus de reconciliacion coma aquò se faguèt en Irlanda.
Galícia :
Cal tanben mençonar que, malgrat la victòria de la dreta (Partida Popular) en Galícia, los partits federalistas, ecologistas e sobeiranistas an agradat a mai d’electors que per las eleccions passadas. Entre lo BNG ( Bloque Nacional Galego) e AGE ( Alternativa Galega de Esquerda ) lo nombre de lors deputats al Parlement galician es passat de 12 a 16.
David Grosclaude,
Partit Occitan.
Contact-presse/contact premsa :
David GROSCLAUDE
06 83 01 19 37