Dempuèi maites meses, de centenats de personas se son installadas sus la ZAR (Zòna d’Amenatjament Remès) del siti de Nòstra Dòna de las Landas. Protestan contre un projecte de betonatge a refòfi, dins los cartons dempuèi d’annadas que la mesa en òbras s’es aviada amb la reconéissença de l’utilitat publica del projecte en 2008.
Amb los 2 000 ha de zònas umedas e agricòlas concernidas e las expropriacions de paisans a venir, alara que las energias fossilas s’escantissan, que lo trafec aerian sus Nantas (Naoned, en breton) s’es demesit de 4 del cent en 2011 e ni per l’opausicion d’una granda part dels estatjants, l’asenada e l’inutilitat del projecte son pas mai a demostrar.
Çaquelà, lo President de la Republica, lo sèu Primièr Ministre e lo govern, sostenguts per Vinci Airports, refusan tota suspension en ensajant de passar per fòrça. Los eveniments d’aquestes darrièrs jorns al contre dels ocupants de la ZAR (arrestacions, intervencions policieras, repression, …) rampèlan lo conflicte de las annadas 70 sul platèu del Larzac.
Lo Partit Occitan sona doncas lo Primièr Ministre socialista, conse de Nantas (Naoned) duscas al mes de junh passat, a ausir los arguments dels opausants al projecte en arrestant primièr tota mena de repression. Lo govern e lo Partit Socialista (sostenguts dins aquel afar per l’UMP) devon pas faire de NDDL un novèl Larzac !
Nombroses comitats de sosten e collectius s’organisan en Occitània (Milhau, Marsilha, Bordèus, Marcilhac, Nimes, Lemòtges, Clarmont d’Auvernha, …). Lo Partit Occitan i prendrà part e pòrta son sosten a la protèsta de reapropriacion organisada a NDDL lo 17 de novembre que ven.
Lo Partit Occitan s’opausa als grands projectes inutilas portats pel govern. A Nantas (Naoned) coma a Roissy – dins l’encastre del projecte del Grand Paris - , sem opausats a la liquidacion de tèrras agricòlas indispensablas per l’alimentacion de pròche. Convidam lo govern a milhor usar dels aeropòrts qu’existisson sus l’airal del territòri francés en soscant a la complementaritat entre resal aerian, resal de las linhas e resal rotier.
Guilhèm LATRUBESSE,
Pòrta-paraula del Partit Occitan.
Contacte premsa :
Guilhèm LATRUBESSE
06 24 70 78 57
secretari.federal@partitoccitan.org/archivas