La ministra de la Cultura e de la Comunicacion expliquèt dijòus passat, en responsa a una question d’un senator socialista, que "França metrà en òbra lo procediment de ratificacion de la Carta europenca de las lengas regionalas o minoritàrias".
Es la confirmacion de çò que diguèt e escriguèt François Hollande. Es una bona novèla. Es tanben la mesa en plaça de çò que prometèt Joan Pèire Bel, lo president del Senat a Tolosa lo 31 de març passat del temps que 30 000 personas s’èran ramosadas a Tolosa en favor d’un estatut per l’occitan. Aquel 31 de març, Joan Pèire Bel èra vengut representar lo candidat François Hollande.
La Carta dèu èsser ratificada al pus lèu e lo ministèri se dèu metre a l’escritura d’un projécte de lei que balharà un estatut legal a las lengas per èsser reconegudas e se desvolopar.
França es grandament tardièra dins aquel domèni. Se vòl, lo govern pòt anar lèu-lèu.
Lo Partit Occitan desira per el que la competéncia per ficar en plaça una politica per las lengas siague balhada a las regions. Pel territòri de la lenga occitana, un organisme comun a las regions e als territòris ont es parlada serà a posita per bailejar aquesta politica.
La refòrma territoriala a venir dèu prendre en compte aquesta question. Serà lo cas se ne devem creire las darrièras desclaracions de Marylise Lebranchu que pòrta lo projécte de lei sul novèl acte de decentralisacion.
Sonam los parlementàris, los elegits regionals e locals a intervenir al prèp del ministèri per fin de butar al procediment de ratificacion de la Carta e tanben de l’acompanhar del despaus d’un projécte de lei que balharà un estatut per las lengas regionalas.
David Grosclaude, Partit Occitan
Consehièr Regional Aquitania,
President comission Lengas Regionalas de l’ARF
Contacte premsa :
David GROSCLAUDE
06 83 01 19 37