Se ditz que la politica dèu far somiar per interessar los ciutadans.
De regionalizacion n’avem un pauc somiat amb l’esper que França angue cap a un acte novèl e fòrt dins aquel domèni, plan demarcat d’una decentralizacion pron pròcha de las passadas. Mas lo revelh risca d’èsser dificile. Dempuèi qualques jorns, messatges negatius tomban. Lo govern fa mina de se preparar a propausar una refòrma "servici minimum".
Lo refùs de causir clarament la region coma la collectivitat d’avenidor est evident.
Lo president socialista de l’Associacion de las Regions de França n’es trucat e, al nom dels presidents de regions, ditz dins una letra al president de la Republica que las orientacions anonciadas correspondan pas a çò que lo cap d’Estat diguèt a las regions i a paucas setmanas.
Demest los messatges negatius, lo Partit Occitan nòta per exemple lo fach que los fonds europencs serián bailejats a l’encòp pels prefectes e per las regions. Aquela dobla gestion risca de portar d’incoëréncia.
Lo refùs de Marilyse Lebranchu de se prononciar sus una collectivitat pròpia al País Basc nòrd mòstra tanben qu’an pas trapat encara lo coratge de s’opausar als centralizators e recentralizators de tota mena. La ministra ditz qu’a pas de "solucion institucionala". Mas çò que cal es de la volontat politica, una solucion politica.
Caldriá parlar tanben dels mòdes a venir d’escrutin. La proporcionala raja pas de sorga al punt d’inventar binòmes pels despartaments (un òme / una femna) per elegir los conselhièrs generals.
Quant a la fiscalitat de las regions, aquela risca de demorar magra, caitiva e ineficaça. De quinas competéncias alarguidas e de quins budgèts enauçats se podrián prevaler las regions, dins un encastre despartamentalista que cambiariá pas e fàcia als diverses nivèls administratius d’ara mantenguts, benlèu renforçats per d’unes ?
Totes los que somian de decentralizacion auràn un revelh dificile se lo govern fa pas de vertadièras causidas. La region es la collectivitat a la mesura de l’Euròpa e dels enjòcs economics, ecologics, politics que nos confrontan.
Decentralizar, regionalizar, balhar de vertadièrs poders a las regions : n’avem somiat mas es qu’anam trapar qualqu’un per o far vertadierament ?
David Grosclaude, Partit Occitan
Conselhièr regional Aquitània,
President comission Lengas regionalas de l’ARF
Contact premsa :
David GROSCLAUDE
06 83 01 19 37