Censurar qualques articles, es plan. Abrogar la lei, aquò’s melhor !

Lo Conselh Constitucional a considerat qu’una partida de la lei Duplomb èra pas confòrma a la Carta de l’Environament e a decidit de censurar çò que pertòca la reintroduccion de l’acetamiprid, un neonicotinoide. Segur es una bona causa mas es pas pro. Es tota la lei qu’auriá calgut censurar. Tornam dire que per nosautres es pas amb aquela lei que reglarem los problèmas de l’agricultura. En la promulgant, lo president de la Republica a decidit de favorizar una agricultura industriala qu’empacharà lo desvolopament d’una agricultura paisana.

Es una faiçon de renonciar a s’encaminar cap a una agricultura mai respectuosa de l’environament, dels consumidors e tanben dels agricultors e de lor santat. Contunharem de demandar l’abrogacion d’aquela lei e demandam als deputats de s’encaminar cap a la redaccion d’un tèxte que favorizarà lo desvolopament d’una agricultura adaptada a las questions de proteccion de l’environament, de la santat e que prenga en compte lo cambiament climatic amb sas consequéncias que constatam cada jorn : manca d’aiga, fuòcs gigants.

Partit Occitan, lo 18 d’agost de 2025