Lo Parlament de Catalonha ven de far un vòte istoric. Pel primièr còp un parlament dona un caractèr oficial a la lenga occitana. Es per nosautres, elegits encargats a la Region Aquitània e a la Region Miègjorn-Pirenèus de la lenga occitana un eveniment que deu menar los poders publics de l’Estat francés a una reflexion sus la plaça que devon reconéisser a la lenga nòstra.
Volèm tanben felicitar los nòstres amics araneses per la determinacion qu’an agut per qu’aquela lei de reconeissença de l’occitan siá adoptada. Nòstras felicitacions son per tots los araneses, pel Govèrn de Catalonha mas volèm donar una mencion particulara al Sindic d’Aran, Paco Boya, qu’a obrat per aquela lei sens compatar son energia e tanben al vice-president del govèrn Catalan J.L Carod-Rovira qu’a comprés l’importància d’aquela lei. Volèm felicitar tanben los deputats de Catalonha qu’an adoptat aquel tèxte e donat atal a nòstra lenga un estatut que jamai aguèt duscas ara.
Es lo començament d’una istòria novèla per una lenga milenària mas tròp sovent mespresada, per una lenga qu’a donat a l’Euròpa una literatura unica, qu’es lo supòrt d’una cultura qu’es un patrimòni de l’Umanitat tota. Demandam ara a totas las regions occitanas de tirar las consequéncias d’aquel vòte. Lo Parlament de Catalonha ven de dubrir una via ; es possible de la seguir per donar a l’occitan la reconeissença que deu aver pertot sus son territòri.
Guilhèm Latrubesse, Miègjorn-Pirenèus
David Grosclaude, Aquitània
Conselhèrs en carga de la lenga e de la cultura occitana