Lo Partit Occitan apèla a manifestar dimenge que ven, 12 de decembre de 2010, a Vilanòva de Magalona, dins Erau (11 h davant la comuna).
S’agís de sostenir la municipalitat que refusa de tirar lo panèu en occitan ont es marcat Vilanòva de Magalona, dejós lo panèu en francés qu’indica Villeneuve-lès-Maguelone, a la dintrada de la vila.
L’indicacion, a costat del francés del nom occitan de la comuna, seriá pas legala segon lo Tribunal Administratiu de Montpelhièr.
Aquela decision fa pesar de menaças sus totas las accions que pòdon decidir las collectivitats en favor de las lengas ditas regionalas. Mòstra que cal absoludament una lei per donar un estatut a nòstra lenga e a las autras lengas territorialas de França.
Per lo govèrn, que refusa aquela lei, la reglamentacion actuala permet de far de politicas lingüisticas. L’afar de Vilanòva de Magalona mòstra qu’es pas vertat.
Aquela decision marca encara un còp, la volontat d’escafar tota identitat que seriá pas confòrma a la vision estreta de « l’identitat nacionala » portada pel govèrn dempuèi qualques annadas.
Calrà deman tirar tots los panèus que son estats plantats a la dintrada de centenats de comunas d’Occitània, de Bretanha, de Corsega, de Catalonha, del País Basc ?
Cal sostenir la municipalitat de Vilanòva de Magalona : los Occitans an lo dret a lor lenga. La diversitat linguistica es un element màger de la democracia.