Lengas regionalas : l’incoeréncia deu govern
2 février 2011Lo ministre de l’Educacion, dins una responsa faita a una question del deputat alsacian Armand Jung, torna afirmar que lo govèrn a pas l’intencion de prepausar una legislacion en favor de las lengas regionalas.
Segon lo ministre son los principis republicans que s’opausarián a la mesa en plaça d’aquela legislacion. Los ciutadans que parlan una lenga coma l’occitan e que reivindican lo dret a una lei per que lor lenga siá protegida, serián donc de monde que menaçarián los principis republicans ?
Es una vision estreta de la Republica e una interpretacion estequida de sos principis fondators . La constitucion a consacrat lo fait que las lengas territorialas de Franças fan partida del « patrimòni de França » e ara nos dison que de las voler protegir e desvolopar dins un cadre legal es contrari als principis republicans.
Se l’article 75-1 es un article decoratiu e sonque, qué dire d’una Republica que met dins sa constitucion de causas qu’aurián pas cap de significacion e pas cap de consequéncias per la vida dels ciutadans ? Es benlèu aquò anar a contrabriu dels principis republicans.
Lo ministre explica tanben que las lengas regionalas fan ara partida de las competéncias partatjadas amb las collectivitats. Es un pauc estranh de dire aquò a l’ora que las collectivitats son victimas d’una reforma que las empacha d’aver las ressorgas per menar de politicas pròpias.
Mai que jamai los parlamentaris se devon mobilizar per exigir l’inscripcion de lor proposicion de lei sus las lengas dins lo programa de trabalh de l’Assemblada Nacionala e del Senat.
Mai que jamai devèm exigir de nòstres elegits que fagan la pression necessària sul govèrn per que siá mesa en plaça una politica culturala dubèrta.
L’Estat deu arrestar de far una politica culturala elitista que sacrifica un patrimòni qu’es de tots los ciutadans e, al delà, de l’umanitat sancèra.
- Lengas regionalas : l’incoeréncia deu govern