Lo dimars 21 de junh de 2011, lo Conselh General d’Albigés presentèt publicament las resultas de l’enquista sociolengüistica comandada pel Conselh Regional e quatre Conselhs General de la region. Enquista menada lo darrièr trimèstre de 2010 alprèp de 5000 Centroccitans e 1000 Albigeses per la societat « Teleperformància ».
Las resultas exaustivas d’aquesta enquista serán publicadas e presentadas al public pel Conselh Regional tre la dintrada de setembre. Pel moment, e sens dintrar dins los detalhs de las resultas presentadas pel Conselh General d’Albigés ne sortisson las chifras seguentas : Tocant a la practica de la lenga occitana : 59,4 % dels Albigeses se dison mestrejar o aver de nocions en lenga occitana. 87,7 % dels Albigeses desiran que l’occitan prengue una plaça pus importanta dins la vida de cada jorn. 73,1 % pensan que practicar o apréner l’occitan es un signe de dobèrtura. Demest plan maitas, una autra chifra balha l’ample de la demanda : 72,8 % dels Albigeses interrogats se dison favorables a çò que cada escolan pòsque, s’o desira, apréner l’occitan a l’escòla, al collègi o al licèu.
Lo Comitat d’Albigés del Partit Occitan constata - mas aviá pas el besonh d’una enquista sociolingüistica per o saupre - que la populacion Albigesa es favorabla, dins son immensa majoritat, a una socialisacion e un ensenhament de la lenga nòstra.
Espèra ara que se nòstre Conselh General agèt besonh de la tenguda d’unas assisis subre la lenga e la cultura occitanas e d’aquesta enquista per evaluir la demanda de la populacion, aurà èime, d’ara enlà, d’aviar una vertadièra politica lingüistica per satisfar a n’aquestas reivendicacions socialas preissantas. Se n’es estat besonh, la pròva es ara facha que los Occitans espèran de lors Poders Publics una presa en compte consequenta e immediata de lor identitat pròpria.
Partent d’aquí lo comitat Albigés del Partit Occitan demanda instantament al Conselh General de Tarn una traduccion rapida e concreta, dins la vida vidanta, d’aqueste voler popular. Tot bestiratge de la seu part, tota escampa que s’amagariá darrèr una ipotetica baissa de son budgèt es pas receptibla. D’ara endavant tota practica dilatòria de sa part serà condemnada coma antidemocratica.
Mentre que lo despartament vesin de Roergue consacra 600 000 èuros de son budgèt a la lenga e a la cultura occitanas e que lo despartament dels Pirenèus-Atlantiques consacra un million d’euròs per la part biarnesa de son territòri, en 2010 lo Conselh General d’Albigés consacrava pas que 200 000 èuros a la cultura nòstra
Amb los 87,7 % personas interrogadas al moment d’aquesta enquista sociolingüisca, demandam qu’una politica lingüistica seriosa e globala siá lèu aviada dins lo despartament. Tre ara, mas desempuèi ja fòrça temps, demandam (amb los 63,8 % dels Albigeses d’accòrdi sul sicut) una sinhalisacion bilinga de tota la toponimia dins lo despartament. Una accion plan pauc onerosa que permetriá rapidament de socialisar un minimum e rendre visibla la lenga nòstra.
Lo Comitat d’Albigés del Partit Occitan demorarà vigilent a çò que la demanda del pòble occitan siá presa en compte e aquò dins de delaisses acceptables. En Albigés coma endacòm mai en Occitània lo pòble occitan a drech a son identitat e a sa dignitat.
Danièl Rifà, pòrta-paraula del comitat d’Albigés del Partit Occitan