Archives par mot-clé : Aliança Liura Europèa

L’ALE en amassada Generala a Nantas

Actu, Hors Occitanie, oc, , , , ,

L’Aliança Liura Europèa s’es acampada a Nantas aquesta fin de setmana passada per son assemblada generala. Trenta-tres partits regionalistas, autonomistas e independentistas de l’Union europèa èran presents.

Un omenatge foguèt fait a Gustau Aliròl defuntat al mes de febrièr passat. Participèt activament a la fondacion de l’ALE.  Lo Partit Occitan èra de segur representat a aquela amassada. I foguèron votadas de mocions sus tèmas divèrs pertocant las questions de las lengas, de l’environament, dels drets dels pòbles a dispausar de lor futur.

Podèm mençonar una mocion sul dret de Groenlàndia a l’autodeterminacion, una autra sus la reunificacion de  Bretanha —çò qu’èra logic puèi que l’UDB aculhissiá l’amassada a Nantas.

Una autra mocion foguèt votada en sosten a un estatut d’autonomia vertadièr per Corsega e una autra (portada per un grop de uèit partits, dont lo Partit Occitan) sul perilh que representa, per las idèas que pòrta l’ALE e per la democracia en general, la progression de l’extrèma dreta en Euròpa.

Lo Burèu de l’ALE es estat renovelat amb un nombre mai redusit de representants, 13 en plaça de 15. Lo Partit Occitan qu’èra al burèu duscas ara i serà pas mai per los tres ans que venon. A l’ora d’ara son 6 eurodeputats de l’ALE en seguida de las eleccions europèas de junh passat, e aquò limita los mejans economics de l’organizacion.

Tres partits novèls foguèron aculhits (Chunta Aragonesista, Rumagna Unida, Ora Toscana) amai, l’ALE compta dins sas rengadas un partit qu’es ara al cap d’un govèrn estatal dempuèi l’arribada coma primièr ministre en Belgica d’un representant de la NVA, o Nòva Aliança de Flandras.

En meteis temps se debanèt l’amassada generala de la fondacion Coppieters.  Aquela fondacion de l’ALE es un lòc de recèrca e de publicacion. Faguèt ela tanben un omenatge a Gustau Aliròl que i representava l’Associacion pel Desvolopament de l’Escrich Occitan (ADEO), sòcia de Coppieters.

Claire Gago-Chidaine e Dàvid Grosclaude representèron lo Partit Occitan a l’AG de l’ALE.

Decès de Gustau Aliròl : omenatges totes azimuts

***Alertas***, Actu, Auvernha-RA, Comunicats, En dirècte, oc, , , , , , ,

Lo Partit Occitan a perdut lo que foguèt pendent d’annadas son president. Gustau Aliròl es mòrt a 76 ans. Serà sepelit dins son vilatge de Sant Ostian,(Velai) lo matin del 19 de febrièr.

Las reaccions dins l’occitanisme son estadas fòrça nombrosas après l’anóncia de la mòrt de Gustau Aliròl. De reaccions son tanben vengudas de pertot dins l’exagòne, de Corsega, de Bretanha, del País Basc, de Catalonha e de tots los territòris que son recampats dins la federacion R&PS.

Al delà son los partits de l’Aliança Libra Europèa que tanben mandèron de messatges per saludar lo que foguèt un defensor afogat de l’union des pòbles minorizats d’Euròpa.

Gustau es un occitanista istoric que participèt a la naissença del movement politic occitan amb la creacion de VVAP (Volèm Viure Al País). Puèi foguèt un dels fondators del Partit Occitan.

Es coma occitanista que participèt a la creacion de la federacion Regions e Pòbles Solidaris e de l’Aliança Liura Europèa.

Universitari, especialista de dret foguèt tanben elegit per dos mandats coma cònsol màger dins sa comuna. De 2010 a 2015 foguèt conselhèr regional d’Auvernhe. Participèt amb lo Partit Occitan a d’eleccions nombrosas e a totas las mobilizacions en favor de la lenga occitana.

Venguèt participar recentament, al mes de novembre passat a Tolosa, a la reflexion prepausada per l’ADEO e lo Partit Occitan « sus l’occitanisme en 2025 ». Gustau Aliròl mancarà fòrça a l’occitanisme mas son experiéncia, sos escrits nos ajudaràn per seguir lo camin.

 

Partit Occitan lo 17/02/2025

Lo Partit Occitan al congrès de l’Aliança Liura Europèa

Actu, En dirècte, Hors Occitanie, oc, , ,

Aqueste divendres, lo Partit occitan serà present al congrès de l’Aliança Liura Europèa (ALE) que se ten a Estrasborg. I serà representat per Dàvid Grosclaude, secretari federal del Partit Occitan e tanben vice-president de l’ALE.

Aquela federacion d’escala continentala recampa 41 formacions politicas representativas de pòbles demorant dins 19 païses-sòcis de l’Union. Es presidida a l’ora d’ara per la basca Lorena López de Lacalle.

Aquel congrès es un moment important a la velha de las eleccions europèas de l’an que ven, que s’i deurà aprovar lo programa electoral e designar los dos candidats a la Comission europèa (los « Spitzenkandidaten »).