Lo 8 de seteme qu’ei hòrt probable que non i aurà pas mei de govèrn Bayrou. Non sabem pas çò que serà la seguida. E i aurà manifestacions lo 10 de seteme ? Qui aperarà a manifestar e sus quins tèmas. Las causas seràn mei claras dens quauques dias. Totun lo Partit Occitan que ditz lo son punt de vista a prepaus d’una data qui estó hòrt mediatizada.
Denonciar ua politica, denonciar l’injustícia, demandar ua orientacion navèra de las politicas sociaus, economicas e ecologicas qu’ei legitime. Mes essajar de manipular entà reméter en causas principis democratics de basa qu’ei perilhós.
Arrebendí’s, díser qu’èm enmaliciats per la politica anonciada peu govèrn, voler manifestar contra la faiçon qui vòu resòlver la question deus deutes publics, tot aquò ei legitime.
Denonciar l’abséncia de vertadèra politica economica que prenga en compte la justícia sociau, demandar que los mei rics paguin mei que los salariats, taxar mei los revienguts deu capitau e mensh los deu tribalh qu’ei çò que demandam nosautes tanben.
Exigir ua politica ecologica vertadèra, audaciosa qu’ei ua reivindicacion qui partatjam.
Qu’ajustam a tot aquò la reivindicacion d’una refòrma de l’Estat centralizat, per anar cap a ua Republica federala, dab regions dispausant de poders vertadèrs e tanben que reinvindicam los drets per la nosta lenga a ua politica de sostien e de desvolopament en tots los domenis.
Se lo 10 de seteme e dèu estar aquerò de segur que sostienem.
Mes las reinvindicacions exprimidas dens las prumèras cridas a blocar lo país non’s limitan pas a ua critica de la politica deu govèrn. La crida qui apareishó au mes de mai qui s’apèra « Les essentiels » parla d’ua « France Souveraine ». Que i ei presentat un programa qui tòca tots los sectors, dab un vocabulari causit. Los mots que son hèits entà plàser au mei gran nombre, particularament dens los domènis economic e sociau. Au demiei de reivindicacions qui’s disen apoliticas e asindicaus que’n trobam qui n’entran pas briga en las nostas causidas politicas e societaus.
Sortir de l’Euròpa entà recuperar la nosta sobeiranitat ? Lo mot « Frexit » qu’ei emplegat. Que parlan tanben de la defensa de « las arradics crestianas de la França de las soas tradicions crestianas » en tot parlar d’ua « laïcitat d’equilibri » . Qu’ei aquò ? Que sembla resumit per un eslogan : « Pacte français : foi, raison et fraternité ».
Que parlan de mestrejar l’imigracion shens dar nada indica mei. Que vòlen mensh de cargas sociaus e relançar lo consum. Per çò qu’ei de l’ecologia que sembla un discors qui denóncia ua ecologia qui seré tròp radicau.
Que disen la volontat de « promòver ua Republica indivisibla » e « ua França unida dens las soas diferéncias, hòrta de l’egalitat e deu respècte mutuau ». Shens explicacions tot aquò ei floish ! Que segueish la volontat de protegir « las tradicions locaus » e de « promòver lo francés e la francofonia ».
L’aspècte conspiracionista de la crida que pausa problèma quan denóncia un Estat qui seré enter las mans d’organizacions secretas com los « Francs maçons ». E que dan ua lista de noms de personalitats qui serén a l’origina de manipulacions e d’influéncias ocultas sus l’Estat e la soa politica. Tot aquò desemboca sus la proposicion de « dissòlver l’aparelh partisan ». Suprimir los partits politics e los remplaçar per qué ? N’ac disen pas.
Tot aquò nos hè tornar en periòdes qui n’estón pas propicias a la democracia.
Que pensam los partits son indispensables en democracia, com los sindicats.
Que i a un perilh a sostiéner shens condicions aqueth movement e a mesclar la nosta votz a la de monde qui vòlen manipular l’opinion e que poirián plan estar eths tanben manipulats.
Que dam lo noste sostien sonque a reivindicacions qui son la critica e la denonciacion d’una politica economica, sociau e ecologica injusta, virada sonque cap a la preservacion d’un sistèma qui favoriza los mai rics.
Que demandam un cambiament en pregondor de la politica budgetària, ua refòrma de l’Estat.
Non daram pas nat sostien a ideas qui son contràrias aus principis elementaris de la democracia en deishar créder que seré lo biaish de « recuperar la sobeiranetat deu pòble ». Qu’ei suspècte e que pud a la manipulacion.
ÒC per ua accion qui denonciarà la causida governamentau de har pagar las derivas de l’Estat centrau francés sonque per la massa deus petits, deus escurs e deus shens grades.
NON a un caòs organizat per fòrças escuras de qui l’objectiu unic ei le destruccion de la democracia
