(Fòto Jaber Jehad Badwan – CC)
La situacion de famina a Gazà es pas que la resulta de la volontat del cap de govèrn israelian de seguir la guèrra, qué que ne còsta e de destrusir l’ensemble de la populacion. Fa de la familia una arma de destruccion de la populacion de Gazà e uèi quasi un mièg-milion de personas con sont confrontadas a de condicions de famina e l’ensemble de la populacion patís une insecuritat alimentària aguda.
Benyamin Netanyahou vòl pas arrestar una guèrra qu’es lo sol biais per el de se mantenir al poder. La fugida endavant d’un òme aliat a l’extrèma-dreta a ja costat la vida a de detzenat de milièrs de personas. Los bombardaments e uèi la famina organizada an pas qu’un objectiu : far de Gazà un territòri voidat de sos estatjants, permetent atal d’en far un territòri israelian. Aquela politica d’annexion en cors dempuèi d’annadas amb l’implantacion sistematica e regulara de colonias en Cisjordània s’accelèra dempuèi octobre de 2023.
L’ideologia dels extremistas aliats a Benyamin Netanyahou es pas res que la repeticion de çò que se podiá ausir dins las annadas 1930 quand los regimis fascistas e nazís parlavan del lor besonh « d’espaci vital ».
Afamar la populacion de Gazà per qu’abandone lo territòri, aquò’s l’objectiu. La comunautat internacionala lo constata mas cadun fa tanben lo constat que la populacion de Gazà a pas lo mejan de fugir e d’escapar a la trapèla que Benyamin Netanyahou manten amb un cinisme dels rares. L’Union europèa es fòrça silenciosa e reagís pas, quitament simbolicament, per far respectar lo dret internacional. Fa quitament fogaça quand ensaja de permetre a l’ajuda umanitària de se desplegar a Gazà. Poiriá al mens aviar de sanccions economicas coma foguèt fait contra Russia. La fin de tota ajuda militara a Israèl e l’arrèst dels programas de recèrcas en ligam amb l’armada israeliana son lo minimum que sèm en dret d’esperar d’Euròpa.
La situacion es de tant mai tragica dins la mesura que persona semblante en mesura de far la pression necessària sul cap del govèrn israelian per que mete fin a aquela situacion. Lo sosten de Donald Trump a Netanyahou es sens falha e confòrme a las declaracions e als actes del president dels Estats-Units dempuèi la debuta de son segond mandat. Cal plan reconéisser que pel moment, en defòra d’exprimir la nòstra solidaritat e una indignacion mai que legitima, vesèm pas cap de solucion se dessenhar de tant mai que la ferocitat de la politique de Netanyahou renfortís la posicion de los que, al Hamas, vòlon pas d’un règlament per la negociacion e instrumentalisan lo martiri del pòble de Gazà. Un alt-al-fuòc, lo passatge de l’ajuda umanitària, la mesa en securitat de la populacion gazaoí, atal coma lo respècte del dret internacional e l’aplicacion de las sanccions son pasmens indispensables e lo punt de partença de tota discussion. Aquò fa de tant mai dificila la possibilitat d’impausar una solucion a dos Estats. Sens la reconeissança d’un Estat palestinian per un nombre d’Estats mai consequent, res serà pas possible a tèrmi long.
Partit Occitan lo 26/07/2025
