Archives par mot-clé : Russia

Ucrània : l’UE pòt pas èstre absenta d’una negociacion

Actu, Comunicats, Hors Occitanie, oc, Premsa, , , , , ,

La question de la patz entre Russia e Ucrània concernís l’Union Europèa. 

Lo rencontre enter lo president dels Estats-Units e lo president de la Russia mòstra que D.Trump a decidit de considerar V.Potin coma un cap d’Estat normal. L’ajuda a tornar trobar una plaça dins las relacions internacionalas.

Es pas una bona novèla pel pòble d’Ucrània, es pas una bona novèla per l’Euròpa e es pas una bona novèla tanpauc per la patz. Que de negociacions se fagan sens la preséncia de responsables politics del país qu’es victima de l’agression ne ditz fòrça sul respècte que los dos caps d’Estats an pel pòble ucranian.

Ne ditz fòrça tanben sul mesprètz qu’an cap a l’Euròpa.

La politica imperialista de Potin, sa vision guerrièra de la politica seriá encoratjada se de concessions territorialas e politicas son acordadas a la Russia. Seriá una prima donada al militarisme rus. Perqué s’arrestariá après una tala victòria politica, diplomatica e militara ?

Lo Partit Occitan espèra que los europèus seràn a la nautor del desfís que se presenta a eles. Un règlament de la guèrra aviada per Potin se pòt pas far fòra de la preséncia de l’UE. Es tanben çò que demandan los responsables ucranians.

Partit Occitan, lo 18 d’agost de 2025

Ucraïna : un còp d’Estat diplomatic de la Maison Blanca !

***Alertas***, Comunicats, Hors Occitanie, oc, Premsa, , , , , , , , ,

Los Estats-Units vòlon far partir Zelinski. Segurament auràn un candidat per lo remplaçar, seleccionat en collaboracion amb la Russia. 

La recepcion de Volodimir Zelinski del 3 de mars (captura YouTube), organizada coma un tracanard, desemboquèt sus une seria de comentaris e de messòrgas que vòlon far creire que lo President d’Ucraïna a pas de legitimitat e que vòl pas la patz. Donald Trump s’es afanat d’ordonar una « pausa » dins l’ajuda militara dels Estats-Units als ucraïnians, a la seguida d’aquel rencontre. 

S’agís plan d’un còp d’Estat diplomatic. Los Estats-Units vòlon far partir Zelinski sens prendre en compte la volontat del pòble ucraïnian. La volontat politica de Donald Trump es clarament concertada amb Vladimir Potin.

De segur, los Estats-Units an causit, en relacion amb Moscòu, un candidat per remplaçar lo president Zelinski. Un president « causit » per las doas poténcias seriá benlèu mens reticent a conclure un acòrd sus l’espleitacion de las ressorsas ukraïnianas per remborsar l’argent engatjat dins lo conflicte o quitament finançar la reconstruccion del país.

La politica estrangièra de Trump tòrna prendre, amb de metòdes un pauc diferents, la que poguèrem conéisser del temps de Reagan e Nixon. Podèm pensar a l’exemple de Chile en 1973, quand la CIA ajudèt los opausants a Salvador Allende a menar d’accions de blocatge del país e atal donar un pretèxte al general Pinochet per son còp d’Estat. Un còp d’Estat violent seguit per 20 ans de dictatura.

Amb Donald Trump lo sistèma a cambiat un pauc mas l’objectiu es lo meteis : far tombar un cap d’Estat que se vòl pas sosmetre a la volontat de la Maison Blanca. Lo dever dels europèus es ara d’aparar la democracia e sas valors fàcia a una aliança objectiva entre Los Estats-Units et la Russia.

Partit Occitan, lo 05/03/2025

Ucraïna : l’Euròpa deu èstre a la taula de las negociacions

Actu, Comunicats, En dirècte, Hors Occitanie, oc, Premsa, , , , , , ,

Lo Partit Occitan estima que la plaça de l’Union Europèa es a la taula de tota negociacion pertocant la patz en Ucrània.

D’informacions circulan sus de discussions entre lo president dels Estats-Units e lo president rus per que siá mesa en placa una taula per negociar.

L’Euròpa pòt pas acceptar d’èstre estremada dins lo cas que se faga aquela negociacion. L’Euròpa, qu’apara e promòu los principis democratics sus son territòri, dèu pas abandonar Ucrània e la daissar sola a l’entorn d’una taula ont se trobarén sonque Donald Trump e Vladimir Potin que lor sòmi unic es d’espotir nòstras democracias.

L’esfòrç financièr qu’a fait l’UE per ajudar lo pòble ucranian es important. Es un esfòrç qu’an pagat totes los europèus per protegir lor continent de las ambicions imperialistas del president rus e de son mesprètz per la democracia.

La posicion del President dels Estats-Units es tanben preocupanta. Qué vòl ? Vòl plaçar son país coma un actor indefugible dins l’encastre d’una reconstruccion d’Ucrània ? Qualas concession s’aprèsta a far a la Russia ?

Las leçons de democracia que son donadas pels responsables politics americans dempuèi qualques setmanas son inquietantas.

L’abséncia de l’Union Europèa dins d’eventualas negociacions seriá una victòria dels partits d’extrèma dreta que, duscas al dintre de l’UE, an pas quitat de sostenir lo dictator rus.

Enfin, una abséncia de l’UE dins las negociacions seriá tradir lo pòble ucranian qu’a pagat ja fòrça car sa resisténcia a la Russia.