A l’Assemblada nacionala, lo 28 d’abril, se debanèt un debat sus la politica energetica de França pel periòde 2025-2030.
Un debat sens vòte sus una question fondamentala e estrategica coma l’energia, aquò’s plan la marca d’un blòc presidencial a las escanas. Mas una majoritat clara s’es degatjada en favor del recors a l’electricitat d’origina nucleara. Èran pauques las e los que fasián pas del plan Messmer (qu’instaurèt lo tot-nuclear en 1974) l’alfà e l’omegà de la politica energetica francesa.
Dins son discors d’obertura, François Bayrou indiquèt clarament qu’aquela sorça d’energia emplenava totas las condicions : abondanta, sobeirana, competitiva e descarbonada.
Los dos primièrs punts, sobeiranetat e abondància, son mai de l’òrdre de la postura que non pas de la realitat. Los estòcs que dispausam sufisan pas per tenir len esperant los reactors de generacions ulterioras… Quitament en anant posar dins los estòcs d’urani apaurit. L’urani natural importat en cò nòstre ven primièr de Niger e Kazakhstan. Aqueles dos païses son classats respectivament 141en e 120en de 167 dins lo classament per indici de democracia (2023).
Suls dos darrièrs punts, a l’ora d’ara, en comparant las tarifas practicadas pel continent e en mesurant las emissions de CO2… aqueles dos critèris pòdon quasi donar satisfaccion.
L’energia nucleara emet tan de CO2 coma las energias eolianas terrèstra e marina. Problèma(s) : la mesa en servici d’una centrala pren tròp de temps e son provesiment en aiga la rend vulnerabla al cambiament climatic (estrèss idric en estiu, tempèstas en invern) o encara a las tensions geopoliticas (ex. : la guèrra en Ucraïna e la centrala de Zaporijia).
La tarifa francesa per kWh es inferiora de sèt centimes respècte a la mejana europèa. Mas un jorn o l’autre los reactors vièlhs devon èsser desmantelats. Per çò far, la Cort dels Comptes a estimat que calriá desblocar 46,4 miliards d’euros sus quasi un sègle (2020). E parlam quitament pas aquí dels subre-còstes ligats entre autres als retards del las òbras pels reactors EPR 2 que seràn repercutats sus las facturas dels usatgièrs d’una faiçon o d’una autra… adiu paura competitivitat.
Aquela moneda serà pas investida dins d’autras mesuras permetent de demesir las nòstras emissions coma la renovacion dels lòtjaments, de las infrastructuras ferrioviàrias e ciclablas o encara la recèrca e lo desvolopament dins lo domeni de las energias renovelablas. D’energias que son elas vertadièrament abondantas, descarbonadas e sobeiranas. D’energias que pòdon èsser tanben competitivas se òm i met un pauc de bona volontat. Mas bon, aquò èra pas previst dins lo plan Messmer.
Partit occitan, lo 5 de mai de 2025.
