Archives par mot-clé : Regions e Pòbles Solidaris

« Radioscopia del regionalisme » : un sondatge a las resultas edificantas !

Actu, , , , , , ,

A l’escasença de l’Universitat d’Estiu de Regions e Pòbles Solidaris (organizacion que lo Partit Occitan n’es un dels sòcis fondators) que se ten en Corsega, l’IFOP publica una enquèsta larga sus l’estat del regionalisme francés e las aspiracions descentralizatritz dels ciutadans.

Aquel estudi, menat al prèp d’un escapolon representatiu nacional de 2000 franceses e de sèt escapolons territorials especifics, desvèla una França en cèrca d’autonomia territoriala e d’identitat regionala, qu’amaga pas son sosten a las reïvindicacions dels regionalistas sul plan juridic, territorial o lingüistic. Luènh d’èsser un fenomèn marginal, lo regionalisme francés s’afortís coma una aspiracion prigonda a tornar pensar l’organizacion territoriala del país e a valorizar sas diversitats culturalas e istoricas. Aquela radioscopia met a la lutz una paradòxa francesa : la d’un país istoricament centralizat ont s’espandís una demanda crescuda de reconeissença de las especificitats regionalas. 

E l’Occitania dins tot aquò ?

Per çò qu’es d’Occitania, vaquí los ensenhaments principals que se pòdon tirar, en notant ça que la que lo sondatge a portat sus 518 personas sus l’ensemble de las regions occitanas, siá tan coma sus cada autre territòri.

Aquò dona a las resultas occitanas una cèrta dilucion. D’unes focus sus d’unas regions occitanas serián estadas utilas per sasir melhor la realitat contrastada  segon tal o tal territòri. Cal doncas prendre aquel aspècte en compte. Sus la question de la lenga per exemple, es evident que d’unas zònas son mai sensiblas que d’autras a aquela question.

Lo territòri occitan recampa 15 milions d’estatjants. Comparat als autres territòris suls quals I aguèt un focus, aquò significa qu’es entre 4 e 30 còps mai de populacion.

Se seriá pogut demandar un focus sul territòri occitan mai redusit mas aquò demandava de far una causida e o an pas volgut far, per donar pas lo sentiment de privilegiar talas o talas partidas d’Occitania.

Dins lo detalh…

Empacha pas qu’aquel sondatge dona d’indicacions pertocant las tendéncias generalas qu’indican clarament que los tèmas defenduts pel Partit Occitan tròban un resson dins la populacion de las nòstras regions :

70% dels occitans se dison favorables a de leis per las regions per respondre a las realitats del terren.

67 % dels occitans se dison favorables al refortiment del poder de las regions e a se dirigir cap al federalisme.

51 % dels occitans se dison favorables a çò que d’unas regions dispausen d’una autonomia.

84% dels occitans se dison favorables a un ensenhament de l’istòria de lor region.

84% dels occitans se dison favorables a l’ensenhament de la lenga (a egalitat amb Bretanha)

76% dels occitans se dison favorables a la reconeissença oficiala de las lengas regionalas.

52% dels occitans se dison favorables a un ensenhament generalizat de la lenga, prepausada a totes amb possibilitat de derogacion Per las e los qu’o desiran.

72% dels occitans considèran que las collectivitats an pas pro de poders. Es mai que totas las autras regions levat los Bretons que son un punt al-dessús.

91% dels occitans considèran que l’Estat central es desconnectat de las realitats localas (meteissa resulta en Corsega e superiora al País basc e a Bretanha). I a doncas un sentit d’abandon de la part de l’Estat central.

83% dels occitans pensan que los mèdias se concentran tròp sus çò que se debana a París e pas pro sur lor region.

Aquela resulta es confortada per la proporcion d’occitans que pensan que lo poder nacional pren plan en compte los interèsses del lor territòri. Son pas que 29 % a o pensar ! Per çò qu’es d’Euròpa, son 27 % a pensar qu’Euròpa Pren plan en compte aqueles interèsses.

… Quid de l’autonomia de Corsega ?

Lo sicut es a l’òrdre del jorn puèi que i a un projècte de discussion parlamentària que deurà èsser seguit, s’es adoptat per una reforma de la Constitucion.

51% de las personas interrogadas sus l’ensemble de França i son favorablas. Son 76% en Corsega.

Endacòm, 45% dels occitans son favorablas a un estatut d’autonomia per Corsega ; son 59% en País Basc, 65% en Bretanha e 72% en Alsàcia.

Comunicat de R&PS : Lengas regionalas : Non a la França lingüicida

Arquius, Comunicats, Hors Occitanie, oc, , ,

La volontat de hèr desaparéisher las lengas regionalas en França qu’ei confirmada e demostrada per ua seria de decisions de justícia concomitantas qui sortéishen d’intervénguer en Corsega, en mantuas comunas catalanas de las Pireneas-Orientalas e en Martinica, consecutivas eras madeish a sasinas deths tribunaus peths Prefèctes de las regions pertocadas. Mes aquèste còp, Còrses, Catalans e Martiniqués ne deisharen pas las causas atau.  Regions e Pòbles Solidaris qu’eus balhara un sosteng totau.

Quan eth François Bayrou, aparador arreconegut de las lengas regionalas, que sòrt d’èster nomentat Prumèr ministre, la França lingüicida que veng de distinguir-se un còp de més en tot condamnar eths esleguits còrses, catalans e martiniqués qui an decidit de balhar ua plaça oficiala a la lenga deth lor territòri, en eths espacis on tenguen sisa.

Qu’ac an hèit a tot doç, en saber qu’eth Estat e haré tot entà deféner la sua vision totalitària qui arrefusa a Còrses de parlar còrse, a Catalans de parlar catalan o a Martiniqués de parlar creòle en las lors assembladas respectivas.

Aquera precaucion qu’èra de prevéder a cada còp que las intervencions en lenga regionala e serén atenhedissas a ua revirada simultanea en francés de faiçon a escartar eth arcast d’amassadas obèrtas a un public d’administrats de qui ua partida non compreneré pas eths desbats ausquaus assisti. E que, en cas de deliberacion, l’arrevirada francesa qu’ei la fehasenta.

Aquò’s hè en eths autes país d’Euròpa shens qu’estrictament arrés non s’en espaume. Eths esleguits catalans o bascos d’Espanha que deliberan en catalan e en euskara, eths esleguits galés deth Reiaume Unit que deliberan en galés dab l’arrevirada simultanea en anglés, eths esleguits deth Tiròl en Italia que deliberan en alemand, etc.
Shens comptar eths esleguits de la Vath d’Aòsta en Italia qui pòden deliberar…en francés ! Coma ac hen tanben eths Quebequés qui hen víver la lor lenga francesa minoritària en un Canadà hèra majoritàriament anglofòne.

Eth Serge Letchimy, President de la Collectivitat Territoriala de la Martinica, qu’a tornat ath Prefècte qui a tradusit la deliberacion declarant eth creòle « lenga oficiala ath madeish títol qu’eth francés » davant eth tribunau administratiu :
« que sèi d’ara endavant qu’èm condamnats peras institucions judiciàras qui non reconéisheran pas la legitimitat d’aqueth combat. Tanplan, que l’assumarèi dab dignitat aquera condamnacion ».

La deliberacion qu’ei estada presa dens l’encastre de la commemoracion de l’avalida de l’esclavatge, e eth President Letchimy que hè eth ligam dab aqueth arrefús  « d’acordar un dret naturau imprescriptible » ath pòble martiniqués.

Madeisha tonalitat en Corsega on l’Assemblada de Corsega qu’a vist eth sué arreglament interior deferit peth prefècte de Region per avér previst la possibilitat de s’exprimir pendent eths debats autan plan en lenga còrsa com en françés. Eth Conselh Executiu de Còrsa qu’a previst de recórrer en cassacion e sustot de contunhar en seguir davant las Cors de justícia europeas : « aquera decision que’ns apareish coma contràri aths tèxtes europèus e internationaus ».

En Catalonha cinc maires qu’an arrefusat de floishar davant las intimidacions prefectoralas e d’arretirar las loas deliberacions a favor de l’usatge de la lenga catalana pendent eths conselhs municipaus. La Cor Administrativa d’Apèl de Tolosa qu’eus a condamnats, mes que van eths tanben contunhar eth combat dinc davant las juridiccions europeas e internationalas.

Regions e Pòbles Solidàris que sosteng eth lor combat.

Atau que portaram amassa ua exigéncia de modificacion constitutionala qui clave a  l’en·hastigaira discriminacion qui truca las lengas regionalas en França, e entà qu’eth   govèrn de François Bayrou e ratifique, totun, la Carta Europea de las Lengas Regionalas e Minoritàrias deth Conselh de l’Euròpa.

François ALFONSI, president de R&PS

Decès de Gustau Aliròl : omenatges totes azimuts

***Alertas***, Actu, Auvernha-RA, Comunicats, En dirècte, oc, , , , , , ,

Lo Partit Occitan a perdut lo que foguèt pendent d’annadas son president. Gustau Aliròl es mòrt a 76 ans. Serà sepelit dins son vilatge de Sant Ostian,(Velai) lo matin del 19 de febrièr.

Las reaccions dins l’occitanisme son estadas fòrça nombrosas après l’anóncia de la mòrt de Gustau Aliròl. De reaccions son tanben vengudas de pertot dins l’exagòne, de Corsega, de Bretanha, del País Basc, de Catalonha e de tots los territòris que son recampats dins la federacion R&PS.

Al delà son los partits de l’Aliança Libra Europèa que tanben mandèron de messatges per saludar lo que foguèt un defensor afogat de l’union des pòbles minorizats d’Euròpa.

Gustau es un occitanista istoric que participèt a la naissença del movement politic occitan amb la creacion de VVAP (Volèm Viure Al País). Puèi foguèt un dels fondators del Partit Occitan.

Es coma occitanista que participèt a la creacion de la federacion Regions e Pòbles Solidaris e de l’Aliança Liura Europèa.

Universitari, especialista de dret foguèt tanben elegit per dos mandats coma cònsol màger dins sa comuna. De 2010 a 2015 foguèt conselhèr regional d’Auvernhe. Participèt amb lo Partit Occitan a d’eleccions nombrosas e a totas las mobilizacions en favor de la lenga occitana.

Venguèt participar recentament, al mes de novembre passat a Tolosa, a la reflexion prepausada per l’ADEO e lo Partit Occitan « sus l’occitanisme en 2025 ». Gustau Aliròl mancarà fòrça a l’occitanisme mas son experiéncia, sos escrits nos ajudaràn per seguir lo camin.

 

Partit Occitan lo 17/02/2025

Regions e Pòbles Solidaris a las eleccions legislativas : de candidats un pauc pertot

Actu, , , , , , , , , , ,

Los partits autonomistas de la federacion presentan de candidats en nombre, malgrat las dificultats pausadas per la decision d’organizar dins un temps fòrça cortet aquelas eleccions legislativas que venon après la dissolucion volguda pel president de la Republica.

Los partits de la federacion Regions e Pòbles Solidaris an causit quasi tots de presentar de candidats per las eleccions legislativas. 

Los partits còrses primièr, qu’an tres deputats sortents, presentan de candidats dins totas las circonscripcions, que siá Femu a Corsica o lo Partitu di a Nazione Corsa. 

En Catalonha Nòrd Oui au Pays Catalan  e Unitat Catalana auràn de candidats dins las quatre circonscripcions del departament de Pirenèus Orientals. 

En Alsàcia Unser Land serà present dins las quinze circonscripcions alsacianas. Cal ajustar tanben un candidat del Parti des Mosellans dins una circonscripcion de la Mosèla. 

En Savòia lo movement MRS Sabaudia serà el tanben representats dins las quatre circonscripcions. 

Lo Partit Occitan coma o avèm ja indicat aurà de candidats dins nòu circonscripcions. Quatre en Bearn e Landas, un dins Tarn e quatre en Provença. 

Los bretons de l’UDB, qu’avián entamenat una negociacion dins l’encastre del novèl Front Popular, son pas arribats a un acòrd amb los partits d’esquèrra que prepausèron pas a l’UDB de circonscripcion que se podiá ganhar. Donc l’UDB a pas ges de candidats per aquesta eleccion. 

Cal senhalar çaquelà que Paul Molac serà candidat per temptar d’èstre elegit pel quatren còp dins sa circonscripcion bretona de Morbihan ; mas serà una candidatura independenta, sens etiqueta, quitament se P.Molac a lo sosten de R&PS.  

En País Basc ont i a sonque tres circonscripcions an negociat tanben amb lo Novèl Front Popular. Atal la coalicion EH Bai a un candidat que serà sostengut pel NFP mentre que daissan las doas autras circonscripcions a de socialistas. 

Mercés a nòstras deputadas e nòstres deputats europèus

Actu, Eleccions, Hors Occitanie, oc, , , , , ,

Lo Parlament europèu a clavat la setmana passada la legislatura. Lo Partit Occitan vòl saludar lo trabalh fait pels eurodeputats de l’Aliança Liura Europèa tot al long d’aquelas sièis annadas.

Amb lors collaborators trabalhèron dins de domenis que son per nosautres centrals e importants dins nòstra vision de l’Euròpa.

Faguèron d’intervencions dins lo domeni dels Drets umans, de la luta contra totas las discriminacions, las lengas ditas minoritàrias, lo cambiament climatic, la plaça de las regions dins las decisions europèas, los refugiats, la situacion de las islas, l’ajuda a una agricultura durabla, la pesca, los transpòrts…e fòrça questions mai.

Trabalhèron dins l’encastre del grop Verds-ALE per una Euròpa que deu respectar los drets dels pòbles. Mantenguèron de relacions amb de partits e d’organizacions que son pas dins l’Union mas que comptan fòrça per bastir l’Euròpa de deman ( los partits del Reialme-Unit après lo Brexit, d’organizacions que son a las frontièras de l’Union tanben com al Naut Karabac o al Curdistan).

Volèm saludar particularament lo trabalh realizat per François Alfonsi, eurodeputat de R&PS que foguèt un interlocutor preciós per nòstre partit. Foguèt plan present sus las questions de las lengas, dels drets dels pòbles a l’autodeterminacion e tanben sus la question de las islas. Mercejam tanben Lydie Massard que prenguèt sas foncions a nòu meses de la fin de la legislatura mas que volguèt çaquelà metre l’accent sus las questions de l’alimentacion, de l’agricultura e de la santat.

Mercés a totas e tots e dins l’espèra que i aurà dins la legislatura venenta de voses per portar l’idèa d’una Euròpa democratica, dubèrta, divèrsa e respectuosa dels drets fondamentals. Cal d’eurodeputadas e d’eurodeputats determinadas e determinats per lutar contra la pujada de l’extrèma-dreta.

Partit occitan 28/4/24   

LO PRG, LEI REGIONALISTAS DE R&PS E VOLT FRANCE REFORTISSON LA COALICION PER EURÒPA E LEI TERRITÒRIS

Comunicats, Eleccions, oc, , , , , ,

Lo Partit Radicau de Senèstra (PRG), Regions & Pòbles Solidaris (R&PS) e Volt France fan avans cotria per faire lista comuna ais eleccions europencas dau 9 de junh de 2024.

Moviment paneuropenc representat dins totei leis Estats membres de l’Union  europenca per mai de 140 elegits ambe dos deputats europencs, Volt apara un anament participatiu volontarista e pragmatic per una Euròpa mai democratica, ecologica e solidària.

Per fin de bastir una Euròpa capabla de respondre ai desfis contemporanèus de nòstra societat e de faire fàcia a la montada dei populismes, lo PRG, R&PS e Volt France an l’ambicion comuna de metre nòstrei territòris au còr de la pensada sus lo ròtle de l’Union europenca dins lo quotidian dei Francés e Europencs que vivon en França.

Ensems, lo PRG, R&PS e Volt persegon lei discussions per recampar d’autrei compausantas.

La lista completa, representativa de la societat tota e de totei lei territòris serà representada a la debuta de març.

REGIONALIZAR LA PAC E ASSEGURAR TANT L’AUTONOMIA ALIMENTÀRIA D’EURÒPA COMA AQUELA DEI TERRITÒRIS PER SORTIR DE LA CRISI AGRICÒLA 

Comunicats, oc, , , , ,

 Lei manifestacions deis agricultors an fach lume fortament sus una crisi que quita pas de s’agravar, durbent la pòrta ai reaccions politicas de tota mena. 

Dins aqueleis entremiejas, Euròpa vèn malurosament la tòca dei criticas generalizadas, butant de fons en cima lei tensions dintre la societat. I veson leis eurosceptics una escasença per enfortir sei posicions, mentre que lo governament cèrca de se descargar de sei responsabilitats.

   Es imperatiu de remembrar que l’extrèma drecha, la drecha tradicionala e lo partit de la majoritat presidenciala an totei votat  aquela Politica Agricòla Comuna (PAC). Ara-ara, aquela majoritat presidenciala a tanben balhat l’avau ais acòrdis de libre-escambi ambe la Nòva Zelanda.

En mai d’aquò, lo 25 de genièr, una coalicion que s’endevèn de l’extrèma drecha fins qu’ a Renew au parlament, aprovèt l’utilizacion libra dei noveis OGM lei NTG, enfortissent la man mesa dei multinacionalas sus l’industria agroalimentària au despens de l’economia locala, dei païsans e paisanas. 

Mesuras per una transformacion immediata

  Acarat a aquela situacion alarmanta, Regions e Pòbles Solidaris desira rampelar lei ponchs seguents d’una transformacion immediata de la politica agricòla europenca :

   • Reconoissença deis Actors Agricòlas e Promocion de l’Autonomia Alimentària : es a la PAC de decessar de remunerar segon la talha dei tenements e dau bestiau, donant preferéncia puslèu ais agricultors coma actius. Es imperatiu de sotalinhar que l’autonomia alimentària de l’Union Europenca e sei territòris pòu passar que per una conversion vès la policultura e la creacion de mantei bastidas. Pasmens la PAC d’ara   favoriza l’agrandiment dei tenements exixtents, perpetuant ansin un modèle pauc compatible ambe la diversificacion necessària. Es pas d’asard se encuei lei dos tèrç dei tèrras s’apondon a l’agrandiment dei bastidas existentas puslèu qu’a la creacion de bastidas nòvas pasmens necessàrias.

  • Regionalizacion pertinenta en repòsta en de realitats variadas : Regions e Pòbles Solidaris plaideja per una regionalizacion dau segond pielon de la PAC, tot prenent en còmpte lei problematicas especificas dei regions francesas desparieras. Per exemple, en Provença, lo desfís magèr es dins lo foncier e la crompa dei tèrras agricòlas, mentre que en Bretanha, la subreproduccion a rapòrt de la populacion a d’enjuecs pròpris, e en Corsega l’importacion de la magèr part dei produchs agricòlas pausa d’autreis interrogacions. La centralizacion dei decisions au ministèri de l’agricultura mostrèt sei limits, es temps de donar ai regions la competéncia d’ajustar seis estrategias segon sei besonhs pròpris.

    • Proteccion de nòstra sobeiranetat alimentària :  Leis acòrdis de libre-escambi son d’èstre tractats ambe prudéncia, estent pas la norridura que simpla marchandisa. Es pas un ben ordinari mai respònde a un besonh vitau que faiçonèt nòstrei regions, nòstre paisatge, nòstra istòria e nòstreis espeficitats. La Federacion demanda l’introduccion d’una excepcion alimentària dins leis acòrdis en cors e plaideja per de clausas proprias constrenhentas qu’impausan de nòrmas environamentalas e socialas equivalentas a aquelei de l’Union Europenca per lei produchs importats. Tot esperant aquestei condicions minimom, lei negociacions ambe Chile e Mercosur son d’èstre aplantadas.

Lo besonh d’Euròpa

   Afiermar qu’avèm de besonh de mens d’Euròpa es que simplificacion reductritz. França, premiera beneficiera de la PAC, reçaup 9 miliards d’euròs. Pasmens, es a la politica agricòla de se metamorfosar en aprochament mai duradís, centrat sus leis òmes, lei fremas e lei territòris, garantissent ansin nòstra autonomia alimentària. Es a l’Union Europenca de passar lo prisme economic, de passar una etapa novèla de sa bastison per garantir a cadun, notadament ais agricultors e agricultritz que nos noirrisson, un revengut decent.

   Regions e Pòbles Solidaris cridan a aquelei cambiaments significatius per assegurar l’avenidor de nòstra agricultura e nòstra alimentacion.

Lydie Massart, co-pòrtaparaula de Regions e Pòbles Solidaris

Gérard Tautil, traductor

Democracia, diversitat, solidaritat per totas e totes en Euròpa

Actu, Eleccions, Hors Occitanie, oc, , , , , , , , , , ,

L’Aliança Liura Europèa fasiá son congrès en fin de setmana passada a Estrasborg.

Lo Partit Occitan participèt divendres e dissabte passats al Congrès de l’Aliança Liura Europèa, lo partit europèu ont son amassats quaranta-e-un partits regionalistas, autonomistas e independentistas d’Euròpa.

Lo Congrès aqueste èra lo primièr organizat per l’ALE. Lo partit, creat fa mai de trenta ans, faguèt un omenatge a dos de sons creators qu’èran l’escocesa de Winnie Ewing e lo còrse Max Simeoni ; los dos moriguèron en 2023.

L’objectiu primièr èra d’adoptar un tèxte que serà lo messatge que mandaràn e portaràn totes los partits de l’ALE per las eleccions europèas de junh de 2024.

L’Euròpa per totas e tots es lo messatge : democracia, diversitat, unitat ne son los pilars.

La question de las lengas es tanben una de las tematicas centralas. Fòrça partits de l’ALE son en punta dins la defensa de lor lenga sus lor territòri.

Evidentament la diversitat dels partits e de las situacions pòt g-far qu’es qualque còp malaisit de trobar un acòrd sus totas las questions que concernisson lo continent europèu. D’unas questions son pas vistas per totes de la meteissa faiçon, mas sus çò d’essencial, lo tèxte es clar. Lo dret a l’autodeterminacion es la basa amb las questions del moment que son los tèmas ecologics que l’ALE pòrta dempuèi d’annadas.

Lo congrès foguèt tanben l’escasença de causir los que seràn los « spitzenkandidaten» a saber las doas personas que son los candidats de l’ALE a la presidéncia de la Comission europèa. Totes les partits europèus fan aquela causida que lor permet de dispausar de dos pòrtaparaulas que pòdon far campanha per tota l’Euròpa e representar lo partit.

Aquela causida es tanben una faiçon de mandar un messatge. Los dos candidats seràn primièr Mailys Rosberg, una jove militanta de la minoritat danesa d’Alemanha e sòci del partit SSW (Südschleswigscher Wählerverband) e Raül Romeva, un responsable politic catalan de ERC (Esquerra Republicana de Catalunya) qu’a passat quatre annadas en preson en seguida del referèndum de 2017 (fòto çai-dejós).

Cal senhalar tanben la preséncia de sèt eurodeputats del grop de l’ALE (grop Verds-ALE) que venguèron parlar de lor bilanç de la mandatura que s’acaba.

De segur las eleccions europèas se debanaràn sonque al mes de junh de 2024 mas se preparan ja ara. De discussions se debanan un pauc pertot en Euròpa quitament se totes los partits de l’ALE poiràn pas presentar de listas o de candidats en rason de las legislacions sovent discriminatòrias cap a las minoritats.

Comunicat : Regions e Pòbles Solidaris e lo Partit Occitan a las primièras Universitats de las Ruralitats Ecologistas (Dia, 6 al 8 d’octobre 2023)

Accions, Actu, Auvernha-RA, Comunicats, oc, , , , , , , , , , , , ,

Del 6 al 8 d’octobre se tendràn las primièras Universitats de las Ruralitats Ecologistas a Dia. Aquel eveniment annadièr permtrà als ecologistas de trabalhar las questions importantas pels nòstres territòris rurals.

Per aquela primièra edicion, EELV, EELV Rhône-Alpes, Génération.s, la FEVE e Regions e Pòbles Solidaris, vos donan rendètz-vos al còr de Droma per 3 jorns de jormacions de talhièrs, de debats, de plenièras, de moments de convivéncia e de rencontres a l’entrons de las ruralitats !

L’eveniment se debanant en Occitania, la federacion Regions e Pòbles Solidaris (R&PS) contribuïrà als escambis amb de representants del Partit Occitan (partit-sòci) animant mantun talhièrs.

Dàvid Grosclaude, secretari fédéral del Partit Occitan (PÒc) e co-pòrta-paraula del Partit Occitan de R&PS :  « Diversitat culturala e lingüistica, quin ligam amb la diversitat biologica ?« 

Pèire Còsta, director de R&PS : « La ruralitat a l’espròva de las metropòlis ».

Domenge Salgon, sòci de de la direccion del PÒc e del Conselh Federal de R&PS : « Camin ferrat e desvolopament durable dels territòris rurals ».

Amai, los eurodeputats R&PS François Alfonsi e Lydie Massard (grop Vers / ALE) respectivement president e pòrta-paraula de R&PS participaràn a las plenièras.


Totas las informacions relativas a l’eveniment son consultablas sul siti : https://ruralitesecologistes.fr/


Contacte: 

Pèire Còsta (‭‬06 25 45 27 05) 

contact@federation-rps.org

Siti Internet: www.federation-rps.org / https://partitoccitan.org

La lenga occitana a «l’Ostal de l’Istòria europèa» 

Actu, , ,

Un diccionari occitan es estat remés a  « l’Ostal de l’Istòria europèa » amb diccionaris d’autras lengas europèas qu’an pas un estatut de lenga oficiala de l’Union mas que fan , çaquelà, partida de la diversitat europèa. 

Claire Gago-Chidaine amb lo diccionari de Cantalausa e François Alfonsi amb un diccionari de lenga còrsa. 

Sabèm que la question de las lengas oficialas a l’Union europèa es sensibla. Fa qualques jorns l’Estat espanhòl, un pauc forçat, a demandat que catalan, galician e basc pòscan dintrar dins la lista de las lengas oficialas de l’Union europèa. 

Es pas encara ganhat. I a d’Estats que s’i opausan. Pasmens, l’Union europèa compta actualament 24 lengas oficialas reconegudas coma lengas de trabalh. 

L’unitat dins la diversitat definís plan Euròpa. Pr’aquò i a d’unas lengas que son pas oficialas mas son mai parladas que de lengas qu’an un estatut oficial.

Mas la realitat linguistica de l’Union europèa es diferenta. Es un territòri ont se parlan mai o mens 65 lengas diferentas. L’unitat dins la diversitat definís plan Euròpa. Pr’aquò i a d’unas lengas que son pas oficialas mas son mai parladas que de lengas qu’an un estatut oficial. Es lo cas del basc, del catalan, del galician mas tanben de l’occitan. 

Abans de poder aver un estatut oficial es ja plan per una lenga de poder èstre presenta  a « l’Ostal  de l’Istòria Europèa » de Brussèlas. L’occitan i èra pas encara. 

Los eurodeputats e las eurodeputadas de l’intergrop « Minoritats »  an portat de diccionaris que mancavan ; los de las lengas ditas « minoritàrias ». Anaràn completar la seccion sus la diversitat lingüistica del musèu ont i aviá duscas ara sonque los diccionaris de las lengas amb estatut oficial. 

François Alfonsi, eurodeputat de R&PS participèt a aquela remesa de diccionaris. Claire Gago assistenta occitanista (POC) de l’eurodeputat  depausèt lo « Diccionari general occitan » de Cantalausa. Es un present del Congrès Permanent de la Lenga Occitana, que fa un trabalh que cadun pòt utilizar cada jorn gràcias a sas aisinas numericas regularament mesas a jorn.